Россиянинг Бахмутни қўлга олишга уринишлари шуни кўрсатмоқдаки, россиялик ҳарбийлар Донбассдаги олдинги хатоларидан ҳеч қандай сабоқ олмаган — аввал улар катта йўқотишлар эвазига операцион ёки стратегик аҳамияти чекланган нишонлар устидан назорат ўрнатганди, деб ёзмоқда Америка урушни ўрганиш институти (ISW) ўзининг кундалик ҳисоботида.
Май ойининг охиридан бери Россия ҳарбийлари Бахмут атрофидаги кичик аҳоли пунктларига доимий равишда куч сарфламоқда, бироқ экспертларнинг таъкидлашича, улар бу йўналишда олти ой ичида бор-йўғи бир неча километр олдинга силжиган.
ISW таҳлилчиларининг кузатувига кўра, бундай ҳаракатлар схемаси Россиянинг 2022 йил ёзида Луганск вилоятидаги Северодонецк ва Лисичанскни эгаллаб олишга бўлган уринишларига жуда ўхшайди. Ўшанда Украина Қуролли кучлари рус қўшинларига катта кучларини стратегик аҳамиятга эга бўлган ушбу икки шаҳарга жамлашга имкон берган ва уларни бир неча ҳафта давомида у ерда ушлаб турган. Якунда, Россия қўшинлари катта йўқотишлар эвазига ушбу шаҳарларни эгаллаган ва Луганск вилояти чегараларига етиб борган, аммо бу тактик муваффақият аҳамиятсиз оператив самарага олиб келди, шундан бери ушбу йўналишда Россия ҳужумларининг катта қисми боши берк кўчага кириб қолди.
Бахмутда ҳам худди шундай натижа бўлиши мумкин: агар рус қўшинлари шаҳарни эгаллаб олишга муваффақ бўлса ҳам, бу операцион устунликларни бермайди, кўрилган йўқотишлар фойдадан ошиб кетади, дейилади ISW ҳисоботида.
Изоҳ (0)