29 ноябрь куни Қатарнинг Qatar Energy давлат компанияси Доҳада Германияга суюлтирилган газни (LNG) кўп йиллик етказиб бериш бўйича шартнома имзолади.
Шартнома доирасида Американинг ConocoPhillips компанияси 2026 йилдан бошлаб Германия шимолидаги Брунсбюттел шаҳри яқинидаги терминал орқали LNG етказиб беришни бошлайди.
Ҳозирда терминал қурилмоқда. LNG етказиб беришнинг йиллик ҳажми тахминан 2 миллион тоннани ташкил қилади.
Газ Қатарнинг иккита энг йирик конлари, Qatar Energy ва ConocoPhillips томонидан биргаликда бошқариладиган North Field East ва North Field Соутҳ конларидан олинади. Шартнома 15 йилга тузилган.
Қатар Энергетика вазири Саад Шерида Ал-Кааби, Германия Европадаги энг йирик газ импортчиси бўлиб, саноат, энергетика ва турар-жой сектори каби соҳаларда ушбу турдаги ёқилғига талаб юқори эканлигини айтди.
Биз Германия ва бутун Европанинг энергия хавфсизлигига ҳисса қўшаётганимиздан мамнунмиз, — дейди у.
ConocoPhillips бош директори Rayan Lens ConocoPhillips ва Qatar Energy компанияси Қатардаги лойиҳаларимиздан бутун жаҳон бозорига хавфсиз ва барқарор LNG етказиб бериш имкониятидан хурсандмиз, деб қўшимча қилди.
Бу охирги бир неча кун ичида Қатардан кўп йиллик LNG етказиб бериш бўйича имзоланган иккинчи йирик келишувдир.
21 ноябрь куни Qatar Energy Хитойнинг Sinopec компанияси билан 27 йиллик LNG етказиб бериш бўйича шартнома тузди, бу тарихдаги энг узун LNG етказиб бериш шартномаси бўлди.
Шартнома шартларига кўра, Qatar Energy бу даврда Хитойга йилига 4 миллион тонна LNG етказиб беради. Битим ҳажми 60 миллиард долларга баҳоланмоқда.
Қатар дунёда етакчи
Қатар LNG экспорти бўйича май ойида АҚШни ортда қолдириб дунёда биринчи ўринга чиқиб олган эди.
Financial Times маълумотларига кўра, 2022 йилда Европага LNG етказиб бериш бўйича Қатар АҚШ ва Россиядан кейин учинчи ўринни эгаллаган.
Қатарнинг кейинги ўн йилда янги LNG ишлаб чиқариш учун харидорларни жалб қилишга ҳаракат қилаётгани август ойида маълум бўлган эди.
Халқаро Валюта Жамғармаси прогнозларига кўра, бу йил мамлакат иқтисодиёти 5,4 фоизга ўсади ва тахминан 45 миллиард доллар эквивалентида профицит ҳосил қилади.
Россия ва Украина ўртасида уруш бошлангандан кейин Европа Иттифоқи Россияга қарши бир қанча санкциялар қўллади. Бу орқали ушбу мамлакатдан нефть ва газ импортини камайтириб, унинг даромадларини қисқартириш ҳам мақсад қилинган эди.
Қатар эса шу заҳоти Европа бозорини эгаллашга тайёрлигини маълум қилди. Қитъанинг LNG импорти бўйича музокаралар март ойидаёқ бошланган эди.
Бироқ Қатар таклиф қилаётган шартномаларнинг кескинлиги келишувни тезда амалга ошириш имконини бермади. Европа учун Форс Кўрфази давлати шартномаларида АҚШдан фарқли ўлароқ уларни ўзгартириш банди йўқ.
2030 йилгача Европанинг суюлтирилган газга бўлган талаби кескин ошиши кутилмоқда. Қатарнинг ҳам LNG импорти учун янги бозорларни қидираётгани келишувлар амалга ошишида муҳим рол ўйнади.
Мавзуга доир:
Изоҳ (0)