Москвадаги Луна театри актрисаси 37 ёшли Наталья Стешенко ўлимининг дастлабки сабаби маълум бўлди, деб ёзади Tengrinews. У 28 ноябрь куни Москвадаги хонадонида ўлик ҳолда топилган эди.
Стешенкода тромбоэмболия аниқлангани айтилмоқда. Бироқ актриса шу пайтгача соғлиғидан шикоят қилмаган.
Шу билан бирга, актрисанинг турмуш ўртоғи — таниқли сиёсатчи, Давлат думаси собиқ депутати Владимир Семагонинг айтишича, сўнгги вақтларда Наталья тез-тез бош оғриғидан шикоя қилиб турган, шунингдек, паст қон босимидан азоб чеккан.
«Московский комсомолец» нашри аниқлик киритишича, фожиадан бир кун аввал Стешенко 10 ёшли ўғли билан кафега борган, уйга қайтгач, ўзини бирдан ёмон ҳис қилиб, ҳушини йўқотган. Бола қўшниларидан тез ёрдам чақиришни сўраган, бироқ шифокорлар ҳеч нарса қила олмаган, фақат ўлим юз берганини қайд этган. Кейинроқ маълум бўлишича, актрисанинг қон томири тромб билан бекилиб қолган.
Актрисанинг қўшнилари айтишича, у Хамовникидаги хонадонида ўғли ва турмуш ўртоғи билан ўн йилдан бери яшаб келган.
Маълумот учун: Тромбоэмболия — бу томир ёки юрак деворидан узилган қон лахтасининг томир ўзанида тиқилиб қолиши.
Наталья Стешенко 1984 йилда Қозоғистоннинг Павлодар шаҳрида туғилган. Мусиқа ва математика мактабида ўқиган, шунингдек, Бутунроссия давлат кинематография институти (ВГИК)ни битирган. 2000 йилда «Қозоғистон гўзали» танловида қатнашган.
Изоҳ (0)