Ўзбекистонда бир ой давомида сабзи 30 фоизга арзонлашгани маълум бўлди

Сўнгги бир ой ичида Ўзбекистонда сабзининг ўртача улгуржи нархи 30 фоизга арзонлашди. Бу ҳақда EastFruit хабар бермоқда.

Экспертларнинг таъкидлашича, бу янги ҳосилни йиғиб олиш ҳисобига бозорда таклифнинг ўсиши ва экспортчилар томонидан ушбу маҳсулотларга нисбатан паст талаб билан боғлиқ.

Нархлар мониторинги маълумотларига кўра, 2022 йил 21 октябридан 18 ноябригача Ўзбекистонда жорий йил ҳосили етиштирилган сабзи ўртача улгуржи нархлари 5000 сўмдан 3500 сўм/килограмгача (0,45 доллардан 0,31 долларга) пасайган.

2022 йил 18 ноябрь ҳолатига кўра, ушбу маҳсулотларнинг ўртача улгуржи нархи ўтган йилнинг шу санасига нисбатан 17 фоизга юқори.

Ишлаб чиқарувчилар ва бозор иштирокчилари сабзи нархининг пасайишининг иккита асосий сабабини аниқлади.

Улардан биринчиси, янги ҳосил ҳисобига ички бозорда сабзи таклифининг ортишидир, чунки октябрь—ноябрь ойларида Ўзбекистонда ёз ойларида экиладиган «кечпишар» деб аталадиган сабзи йиғиб олинади.

Жорий мавсумда бундай сабзи ҳосили яхши деб баҳоланмоқда.

Иккинчи сабаб, ўтган йилнинг шу даврига нисбатан экспортёрлар томонидан ушбу маҳсулотларга талабнинг камайганидир.

Дастлабки расмий статистик маълумотларга кўра, ўтган ойда — 2022 йил 21 октябрдан 20 ноябрга қадар Ўзбекистон 2,4 минг тонна сабзи экспорт қилган. Бу ўтган йилнинг шу даврига нисбатан 2,2 баробар камдир.

Шу билан бирга, жорий йилнинг ҳисобот даврида сабзи улгуржи нархлари даражаси ўтган йилнинг шу даврига нисбатан ўртача бир хил бўлганини қайд этиш лозим.

Аввалроқ Ўзбекистон бозорларида ноябрь ойида нархлар қандай ўзгараётгани ҳақида хабар берилганди.