Ўзбекистон банклари ўн ойда 80 трлн сўмга яқин даромад олди. Соф фойда 8 трлн сўмдан ошган

Ўзбекистон банклари томонидан жорий йилнинг январь—октябрь ойлари давомида 79,9 трлн сўмлик даромад олинган. Бу ҳақда Марказий банк хабар бермоқда.

Бунда фоизсиз даромадлар 27,4 трлн сўмни, фоизли даромадлар эса 52,5 трлн сўмни ташкил қилган. 

Ўн ойда Ўзбекистон банкларининг фоизли ва фоизсиз харажатлари мос равишда 32,5 трлн сўм ва 9,4 тлрн сўм бўлган. Шунингдек 11,4 трлн сўмлик операцион харажатлар қилинган. 

Йил бошидан бери Ўзбекистондаги банклар 2,5 трлн сўмлик фойда солиғини тўлаган. Бу ўтган йилга нисбатан 1,1 млрд сўмга кўп.

Банклар жорий йилда 8,1 трлн сўм соф фойда кўрган. Улар томонидан сентябрь ва октябрь ойларида 1 трлн сўмдан соф фойдага эришилган. 

Январь—октябрь ойларига кўра соф фойда миқдори ўтган йилнинг мос даврига нисбатан 3 трлн сўмга кўпайган.

Аввалроқ Ўзбекистонда банклар устав капиталининг энг кам миқдорини ошириш таклиф қилинаётгани ҳақида хабар берилган эди.