Бугун, 24 ноябрь куни хорижий давлатларнинг Ўзбекистонга янги тайинланган элчилари томонидан ишонч ёрлиқларини топшириш тантанали маросими бўлиб ўтди. Бу ҳақда «Дарё» мухбири хабар берди.
Шавкат Мирзиёев Корея элчиси Ким Хи Санг, Қирғизистон элчиси Муса Жаманбаев, Жазоир элчиси Бумедиен Геннад, Қозоғистон элчиси Бейбут Атамкулов, Америка Қўшма Штатлари элчиси Жонатан Хеникдан ишонч ёрлиқларини қабул қилиб олди.
Давлат раҳбари янги тайинланган элчиларни самимий қутлаб, Ўзбекистонда дипломатик миссиясини бошлагани билан табриклади.
«Биз келгуси 10 йилда мамлакатимиз ялпи ички маҳсулоти ҳажмини икки баробарга оширишни мақсад қилиб қўйганмиз. Бунинг учун бизда хоҳиш-ирода ҳам, интилиш ва имкониятлар ҳам етарли. Бундай улуғвор марраларга эришиш учун сармоялар ҳажмини келгуси 5 йилда 120 миллиард долларга етказиш, жумладан, камида 70 миллиард доллар хорижий инвестициялар жалб этишни ҳисоб-китоб қилганмиз. Мамлакатимиз эшиклари жаҳон учун, дунё бозорлари эса юртимиз учун очиқ бўлиши керак», — деди Шавкат Мирзиёев.Давлат раҳбари янги элчилар вакиллари бўлган давлатлар билан ҳар томонлама ва узоқ муддатли ҳамкорликнинг истиқболларига алоҳида тўхталиб ўтди.
Корея Республикаси – Ўзбекистоннинг Осиё-Тинч океани минтақасидаги асосий савдо-иқтисодий ҳамкорларидан биридир. Давлатлараро муносабатлар алоҳида стратегик шериклик даражасига кўтарилган. Охирги беш йилда мамлакатларимиз ўртасидаги савдо ҳажми икки баробар кўпайган, бу йил эса 30 фоизга ўсиб, 2 миллиард долларга етган.
2023 йилда Ҳукуматлараро комиссиянинг навбатдаги йиғилиши ва Ўзбекистон-Корея бизнес форуми ўтказилиши режалаштирилган. Ушбу тадбирлардан ҳамкорликнинг янги йўналишларини топиш ва ривожлантириш учун самарали фойдаланиш зарурлиги таъкидланди.
Қирғизистон элчисига мурожаат қилар экан, Шавкат Мирзиёев ўзбек ва қардош қирғиз халқи тарихи ва анъаналари муштарак бўлган яқин қўшнилар эканини қайд этди. Барча долзарб масалалар ўз вақтида, ҳар икки томон манфаатларини ҳисобга олган ҳолда қардош халқларнинг фаровонлиги йўлида ҳал этилмоқда. Айниқса, эришилган келишувлар асосида чегара масалалари ҳал қилингани мисли кўрилмаган умумий ютуқ бўлди.
Минтақавий инфратузилма лойиҳалари, жумладан, Қамбар-ота гидроэлектр станцияси ҳамда Ўзбекистон – Қирғизистон – Хитой темир йўли қурилиши бошлангани ҳам дўст халқларнинг умумий манфаатларига хизмат қилади.
Ўзбекистон президентининг декабрь ойида Қирғизистонга бўлажак ташрифи икки томонлама алоқаларни янада мустаҳкамлашига ишонч билдирилди.
Жазоир – араб-мусулмон оламида жадал ривожланиб бораётган мамлакат. Икки томонлама ҳамкорлик салоҳиятини тўлиқ рўёбга чиқариш мақсадида 2023 йили Ҳукуматлараро қўшма комиссиянинг илк йиғилишини ҳамда «Made in Uzbekistan» саноат кўргазмасини ўтказиш таклифи билдирилди.
Қозоғистон билан сўнгги йилларда икки томонлама алоқаларнинг суръати юқори бўлиб келмоқда. Парламентлараро муносабатлар, ҳудудлар ўртасидаги ҳамкорлик изчил ривожланмоқда.
Устувор соҳаларда 3 миллиард 500 миллион долларлик инвестиция лойиҳалари амалга оширилмоқда. Ўзаро савдо ҳажми ҳам муттасил ўсиб бораяпти. Бу кўрсаткич йил бошидан буён 20 фоизга ортиб, 4 миллиард долларга яқинлашгани ҳам мамлакатлар салоҳияти нақадар катта эканини кўрсатади.
Декабрь ойи бошида Қозоғистон президентининг Ўзбекистонга кутилаётган ташрифи давлатлараро муносабатларда янги даврни бошлаб беришига ишонч билдирилди.
Америка Қўшма Штатлари Ўзбекистоннинг глобал миқёсдаги энг муҳим ва ишончли ҳамкорларидан биридир. Бу йил давлатлар ўртасида дипломатик алоқалар ўрнатилганининг ўттиз йиллиги ҳамда Стратегик шериклик тўғрисидаги декларация имзоланганининг йигирма йиллиги нишонланди.
Давлат раҳбари ўзаро стратегик шерикликнинг янги шароитида Ўзбекистон савдо ва инвестициялар, қишлоқ хўжалиги, тўқимачилик, энергетика, таълим, инновация, соғлиқни сақлаш каби соҳаларда ҳамкорликни кенгайтиришдан манфаатдор эканини таъкидлади.
Фото
Изоҳ (0)