Германиянинг Бреккерфелд шаҳрида жойлашган фермада баландлиги 50 см дан ошмайдиган Памукел исмли 3 ёшли пони яшайди. От Гиннеснинг рекордлар китобига дунёдаги энг кичик от сифатида кириш учун барча хусусиятга эга. Памукел шу қадар чиройлики, унинг суратлари бир зумда ижтимоий тармоқларда минглаб лайкларга эга бўлади. AdMe нашри пони ҳақида қизиқарли маълумотларни тақдим этди.
Памукел — Шотландия пониси ҳисобланади. Пони бир қарашда оғир юк кўтарадиган отларни эслатади, фақат уларга нисбатан кичикроқ. Бу зотдаги отлар қалин жунга ва узун елкага эга. Одатда уларнинг бўйи 65 дан 110 см гача, ўртача вазни эса 150-180 килограммни ташкил қилади. Ушбу памукелнинг бўйи атиги 50 см, вазни эса 35 килограмм.
Қизиғи шундаки, Шотландия понилари инсонларга жуда боғланган. Понилар кўп ҳолларда кўрларга йўл кўрсатувчи сифатида ёрдам беради. Бу отларни қўлга ўргатиш осон, улар жуда юқори ақл ва хотиржам феъл-атворга эга. Шунинг учун улар яхши дўст ва уй ҳайвонлари сифатида сақланади. Понилар кўпинча 30 йил ёки ундан кўпроқ яшайди.
Памукелнинг миттилигининг сабаби генетик нуқсони борлигидадир. «Бу касаллик эмас, балки табиатнинг инжиқлиги», — дейди понининг эгаси, чавандозлар бўйича ўқитувчи Карола Вайдеманн. Аёл уни 3 йил муқаддам, тойчоқ бўлган пайтида олиб келган. «Уни биринчи марта кўрганимда ҳайратда қолганман. Ҳеч қачон бундай кичик отни учратмаганман», — дейди у.
Карола Вайдеманн понисининг Гиннес рекордлари китобига киришини истайди ва ҳужжатларни расмийлаштиришни бошлаган. Бироқ китоб учун маълумот йиғувчи компания вакиллари отлар ва пониларнинг маълумотлари фақат 4 ёшдан бошлаб кўриб чиқилиши мумкинлигини айтган. Айнан шу ёшда отлар ва понилар тўлиқ ўсган ҳисобланади. Памукелнинг маълумотлари кўриб чиқилишини яна бир йил кутиши керак.
Ҳозирда Гиннеснинг рекордлар китобига киритилган дунёдаги энг кичик от — туғма митти бўлган аппалуза зотининг вакили Бомбел ҳисобланади. Бомбелнинг баландлиги деярли 57 смни ташкил этади.
Вайдеманн вақтни беҳуда сарфламади ва бир йилдан бери у ўзининг миниатюрадаги пони терапевти билан бирга болалар боғчалари, қариялар уйлари ва бошқа шунга ўхшаш муассасаларга ташриф буюриб, кўплаб болалар ва қарияларни хурсанд қилади. Терапевтик мақсадларда 3 ёшдан ошган болалар ҳовлида понининг юнгини тараши ёки у билан сайр қилиши мумкин.
Шунингдек Памукел ногиронлар аравачасида ва юришга ёрдам берадиган аравачада инсонларга ҳамроҳ бўлишга ўргатилган, у махсус зинача бўйлаб машинага чиқиши мумкин.
«Бу пони шунчаки чиройли кўринишга эга. Мен доимо уни қучоқлашни, эркалашни ва унга меҳр беришни хоҳлайман. У жуда ёқимтой от ва шунчаки ақл бовар қилмайдиган дўст», — дейди понининг эгаси.
Мавзуга доир: Англиядаги китоб клубида пони курьер бўлиб ишламоқда. У локдаун сабаб учраша олмаётган ўқувчиларга китобларни етказиб беради.
Изоҳ (0)