Америкаликлар яқинлашиб келаётган байрамлар учун камроқ совғалар сотиб олишни, шунингдек, мамлакатдаги инфляция ва иқтисодий муаммолар туфайли хайрия харажатларини камайтиришни режалаштирмоқда. Бу ҳақда ижтимоий сўровномаларга таяниб The Wall Street Journal (WSJ) хабар берди.
Маълумотлар АҚШда истеъмолчилар ва корхоналар совғалар, хайрия маблағлари ва байрам тадбирлари учун сарф-харажат режаларини қисқартирганини кўрсатади, — дея таъкидлайди нашр.
Bankrate томонидан август ойида ўтказилган сўров натижаларига кўра, респондентларнинг 84 фоизи бу йил купонлар ва чегирмаларга таяниб, шунингдек, камроқ нарсаларни сотиб олиб, арзонроқ совғаларни излаш орқали пулни тежашларини айтишган.
Сентябрь ойида Deloitte консалтинг компанияси томонидан ўтказилган сўровга кўра, америкаликлар яқинлашиб келаётган байрамлар учун ўртача тўққизта совға сотиб олишни режа қилмоқда, бу ўтган йилгидан еттитага кам.
Газетанинг ёзишича, АҚШ аҳолиси хайрия ишларига сарфланадиган маблағни ҳам камайтирган.
Kiva краудфандинг платформаси 2 000 америкалик ўртасида сўров ўтказди ва уларнинг кўпчилиги ўтган йилга нисбатан хайрия ишларига камроқ маблағ ажратишни режалаштираётганини маълум қилди.
15 ноябрь куни АҚШ молия вазири Жанет Еллен Индонезиядаги G20 саммити арафасида АҚШ инфляцияси тахминан икки йил ичида нормал даражага тушишини маълум қилган.
10 ноябрь куни АҚШ Меҳнат департаменти мамлакатда истеъмол нархлари октябрь ойида йиллик ҳисобда 7,7 фоизга ошганини маълум қилди.
Изоҳ (0)