Ўзбекистон Қишлоқ хўжалиги вазирлиги ва Германия халқаро ҳамкорлик жамияти (GIZ) «Қишлоқ хўжалиги кооперативлари тўғрисида»ги қонун лойиҳасини ишлаб чиқмоқда. Бу ҳақда вазирлик матубот хизмати хабар бермоқда.
Таъкидланишича, «Кооперация тўғрисида»ги қонуннинг аввалги таҳрири 1991 йилда қабул қилинган бўлиб, у замонавий ишлаб чиқаришга мос келмайди. Унда асосан умумий кооперативларга оид мақолалар мавжуд бўлиб, қишлоқ хўжалигига оид алоҳида мақолалар киритилмаган.
Қонун лойиҳаси Германия қишлоқ хўжалиги федерал бошқармасининг уч нафар эксперти билан биргаликда ишлаб чиқилган.
Қайд этилишича, экспертлар кооперативларда кўп йиллик тажрибага эга. Бу жараёнга маҳаллий мутахассислар ҳам жалб этилган.
Ишчи гуруҳ кооперативлар, томорқа ер эгалари, фермерлар билан ҳамкорлик қилган. Ҳужжат устида ишлаш жараёнида 700 дан ортиқ фермерлар билан суҳбатлар ўтказилган.
2021 йилда вазирлик ишчи гуруҳи дастлабки қонун лойиҳасини ишлаб чиққан эди. У 9 боб ва 48 моддадан иборат эди.
Мутахассисларнинг фикрича, янги лойиҳада ишлаб чиқарувчиларнинг манфаатларини янада аниқроқ бирлаштириш зарур.
Шундан келиб чиқиб, 11 боб ва 60 моддадан иборат «Қишлоқ хўжалиги кооперативлари тўғрисида»ги янги қонун лойиҳаси қайта кўриб чиқилган.
Янги қонун лойиҳасида кооперативнинг ташкилий тузилмасидан тортиб, унинг молиявий аҳволи, аудити, давлат ва кооператив ўртасидаги муносабатлар, бошқарув тузилмалари ва бошқа масалаларгача баён этилган.
Қонун лойиҳасига кўра, кооперативларнинг фаолияти қуйидаги тамойилларга асосланади:
- ихтиёрий ва очиқ аъзолик;
- аъзолар томонидан демократик назорат;
- аъзоларнинг иқтисодий иштироки;
- автономлик ва мустақиллик;
- таълим, ўқитиш ва маълумот;
- кооперативлар ўртасидаги ҳамкорлик;
- жамиятга ғамхўрлик қилиш.
Қонун лойиҳаси 2023 йил 1 февралгача муҳокама қилинади ва тасдиқлаш учун Вазирлар Маҳкамасига киритилади.
Изоҳ (0)