Бугун, 19 ноябрь куни Тошкент шаҳридаги Шаҳидлар хотираси хиёбонидан оқиб ўтувчи Бўзсув каналига аёл киши ўзини ташлаган.
«Дарё» мухбири Тошкент шаҳар Юнусобод тумани 7–клиник шифохонасида бўлиб, масъуллардан изоҳ олди.
Миллий гвардия ҳарбий хизматчиси катта лейтенант Саиднаби Мурсаловнинг «Дарё» мухбирига айтишича, аёл ўзини кўприкнинг устидан сувга ташлаган.
«Кўп сув ютиши ҳисобига ҳушини йўқотган. Ҳолатни кўрган икки нафар Миллий гвардия ҳарбий хизматчилари: Наврўз Эгамберганов ва Сарвар Ибодуллаев уни сувдан олиб чиққан. Шундан сўнг зудлик билан шифохонага тез ёрдам машинасида олиб келинган», — деди катта лейтенант Саиднаби Мурсалов
Дастлабки маълумотларга кўра, 20 ёшли аёл оилавий жанжал туфайли ўзини сувга ташлаган. Шифокорларнинг айтишича, аёл ҳушига келган, ҳозирда ҳолати барқарор.
Воқеа юзасидан тергов органлари суриштирув ишлари олиб бормоқда.
Изоҳ (0)