2022 йил январь—октябрь ҳолатига кўра, Ўзбекистонда янги ташкил этилган чет эл IT компаниялари сони 276 та бўлди. Бу ҳақда Давлат статистика қўмитасидан маълум бўлди.
Ўтган йилнинг шу даврида 75 та чет эл IT компаниялари ташкил қилинган эди.
2021 йил январь—октябрь ойларида Ўзбекистонда 380 та хорижий IT компаниялар фаолият кўрсатаётган эди. Жорий йилда бу кўрсаткич 659 тага етди.
2022 йил октябрь ойида 69 та янги хорижий IT компаниялари фаолиятини бошлади. Сентябрь ойида бу кўрсаткич 11 тани ташкил этган эди.
Шунингдек, август ойида янги хорижий IT компаниялари 26 тани, июлда 20 та, июнда эса 30 тани ташкил этган.
Бунга нима сабаб бўлмоқда?
Бундай ўсиш Украинада уруш бошланиши билан кўплаб Россия ва Беларусь IT компанияларининг бошқа давлатларга, жумладан, Ўзбекистонга кўчиб ўтишга қарор қилгани билан изоҳланади.
Шунингдек, бу Россияда эълон қилинган қисман ҳарбий сафарбарлик фонида мамлакатга кўчиб ўтган мутахассислар сони ортгани билан ҳам изоҳланмоқда.
Россияда ҳарбий сафарбарлик эълон қилингандан сўнг 700 мингга яқин одам мамлакатни тарк этган.
Ўзбекистонга ҳам 2022 йилнинг 9 ойи давомида 318 156 нафар Россия фуқароси кириб келган. Уларнинг 210 минг 902 нафарини эркаклар, 107 минг 254 нафарини аёллар ташкил қилади.
Бундан ташқари, 1 апрелдан бошлаб Ўзбекистонда TashRush дастури ишга тушган, унинг доирасида IT Park ходимлари хорижий IT компанияларга ўз бизнесларини Ўзбекистонга кўчиришда ёрдам бермоқда.
Ўзбекистонга кўчиб келган IT компаниялари орасида қуйидагилар бор:
- Ravenage Games — компьютер ўйинлари нашриёти. Компания молиялаштириш билан ҳам шуғулланади ва ўтган йили 20 млн долларлик фонд ташкил қилди.
- Outer Space — Made on Earth Games ўйинларини ишлаб чиқариш студияси. Компания ҳозир 4Х мобил стратегиясининг устида ишламоқда.
- Fusionlabs — лойиҳа менежерлари ва дастурчиларни тайёрлайдиган ProductStar компанияси.
- ForCode — Diglex (матндан маълумот олиш воситаси) ва Robert Robot (техник ёрдам хизматлари учун сунъий интеллект) ишлаб чиқарувчиси.
- TopFactor — компания ходимларнинг иш фаолиятини бошқаришнинг автоматлаштирилган тизимларини жорий этиш билан шуғулланади.
- Okay QA — дастурий таъминотни синовдан ўтказиш ва сифат назорати компанияси.
TashRush ўзи қандай дастур?
TashRush дастури чет эл IT компанияларини жалб қилиш учун ишлаб чиқилган ва Tashkent Rush, яъни «Тошкент васвасаси» деган қиёсий ном танланган.
Бу ўз вақтида Калифорнияда юз берган «Олтин васвасаси»ни эслатади. Ўша вақтда Калифорнияда олтин кони топилгани ҳақида шов-шув тарқалиб, ҳамма у ерга ошиқа бошлаган бўлса, ҳозир Тошкент кўплаб IT-мутахассислар талпинадиган маконга айланди.
Дастурнинг асосий мақсади — хорижий компаниялар ўз жамоасини Ўзбекистонга релокация қилишида кўмаклашишдир. Ушбу лойиҳа бир неча бепул ёрдамларни ўз ичига олади.
Хусусан, мутахассисларни аэропортда кутиб олиб, ҳамёнбоп турар жой топишигача ёрдам бериш ҳам унинг ичига киритилган.
Изоҳ (0)