Россия президенти Владимир Путин аввалроқ ҳарбий хизматга чақирилган Донецк ва Луганск талабаларини демобилизация қилишни буюрди. Бу ҳақда Кремль матбуот котиби Дмитрий Песковга таяниб, РИА Новости хабар берди.
Донецк ва Луганск Россия таркибига «киритилиши»дан олдин у ердаги талабалар ҳарбий сафарбарликка жалб қилинганди.
«Ҳозирда халқ милицияси қўшинлари Россия Қуролли кучлари таркибига киритилган. Путин талабаларни демобилизация қилиш ва ўқиш жойига қайтишни ташкил этиш бўйича кўрсатма берди», — деди Песков.
Таъкидланишича, энди демобилизация қилинган талабалар уйларига жўнатилади ва ўқишни давом эттиради.
24 февралдан бери Россия Украинада жанговар ҳаракатлар ўтказмоқда. Сентябрь ойи охирида Россия Донецк ва Луганск халқ республикалари, Херсон ва Запорожье вилоятларини аннексия қилди. Ноябрь бошида Россия қўшинлари Херсондан чекинишни бошлади. 11 ноябрь куни Украина ҳарбийлари Херсонга кирди.
Изоҳ (0)