Украина президенти Владимир Зеленский 15—16 ноябрь кунлари Индонезиянинг Бали оролида бўлиб ўтадиган G20 саммитида иштирок этишни режалаштирмоқда. Президент матбуот котиби Сергей Никифоров саммитда Зеленский катта эҳтимол билан онлайн тарзда иштирок этишини айтди.
3 ноябрь куни Зеленский агар G20 саммитида Россия президенти Владимир Путин иштирок этса, унда қатнашишдан бош тортишини маълум қилганди.
«Ведомости» газетаси эса манбаларга таяниб, Путин Балига бормоқчи эмаслигини, унинг ўрнига ташқи ишлар вазири Сергей Лавров қатнашиши ҳақида хабар берганди. Россия президенти матбуот котиби Дмитрий Песковнинг айтишича, Кремль президент Владимир Путиннинг G20 саммитида иштирок этиш-этмаслигини шу ҳафта эълон қилади.
8 ноябрь куни Индонезия президенти Жоко Видодо Путин Балидаги G20 саммитига бормаслигини маълум қилди.
Зеленский ҳам, Путин ҳам G20 саммитига таклиф қилинган. Октябрь ойида Индонезия расмийлари ҳар икки президент саммитда иштирок этишга розилик билдирганини айтганди, бироқ улар «Украина ва Россия ўртасидаги уруш туфайли бу осон бўлмаслигини» таъкидлаган.
Изоҳ (0)