«Харид президент қарори асосида амалга оширилган». Маданият вазирлиги салкам 16 млрд сўм бўлган автомобиллар харидига изоҳ берди

Маданият вазирлиги салкам 16 миллиард сўмга 2 та махсус автомобиль харид қилгани хабар берилганди. Вазирлик ахборот хизмати раҳбари Орифжон Файзиевнинг «Дарё»га маълумот беришича, мазкур харид президент қароридан келиб чиққан ҳолда амалга оширилган.

Айтилишича, Ўзбекистон Республикаси президентининг «Маданият ва санъат соҳасини янада ривожлантиришга доир қўшимча чора-тадбирлар тўғрисида»ги 2022 йил 2 февралдаги қарорига асосан 2022 йил учун календарь режада белгиланган тадбирлар ижросини самарали ташкил этиш мақсадида 2022 йил 1 июнга қадар «Маданият карвони» учун мўлжалланган, тегишли мусиқа техникаси ва саҳнага эга 2 дона махсус автотранспорт воситасини харид қилиш вазифаси белгиланган.

Мазкур қарордан келиб чиққан ҳолда харид қилинадиган «Маданият карвони» учун мўлжалланган, тегишли мусиқа техникаси ва саҳнага эга махсус автотранспорт (трансформер) воситасининг техник параметрлари мутахассислар томонидан белгиланган тартибда ишлаб чиқилди. Бундай замонавий автотранспорт воситасини тайёрлаш имконияти бўйича хорижий давлатлар ўрганилди ва энг маъқули сифатида Хитой давлати танланиб, вазирлик томонидан ОМДМ ва «Huayuan» компанияси билан музокара олиб борилди. Музокара хулосасига кўра, ОМДМ компанияси томонидан 873 минг доллар, Олмаота шаҳридаги «Kazakhstan musical technologies» филиали томонидан 900 026 доллар таклифи (битта махсус автотранспорт воситаси хариди учун) билдирилган.

Бироқ хорижий компаниялар пандемия сабабли махсус автотранспорт воситаси йил якунига қадар етказиб берилишини маълум қилган. Шундан сўнг, Маданият вазирлиги ишлаб чиқилган техник параметрлар асосида махсус автотранспорт (трансформер) воситасини тайёрлаш имконияти мавжуд бўлган (аниқ муддати ва бошқа маълумотлар) маҳаллий корхоналар билан мулоқот олиб бориш ҳамда тегишли хулоса олиш мақсадида «Ўзавтосаноат» АЖ, «UzAvto Trailer» МЧЖ ва «JV MAN Auto-Uzbekistan» МЧЖ қўшма корхонасига мурожаат этди.

«JV MAN Auto-Uzbekistan» МЧЖ қўшма корхонаси тавсияси асосида «СТEYА» Overseas projects» томонидан 1 390 000 евро, Турин политехника университети (Ўзбекистон Республикаси президентининг 2021 йил 1—2 июнь кунлари Сурхондарё вилоятига қилган ташрифида берган топшириғига асосан, Сурхондарё вилояти учун тажриба сифатида кичик ҳажмдаги, мусиқа техникаси ва саҳнага эга махсус транспорт воситасини илк маротаба ишлаб чиқарган) томонидан 9 580 050 000 сўм ҳисобига махсус автотранспорт воситасини тайёрлаш, қолган корхоналар ва «Uz Truck and Bus Motors» МЧЖ томонидан эса 1 394 950 000 сўмга транспортнинг фақат бош қисми билан таъминлаш имконияти маълум қилинган, — дейилади вазирлик изоҳида.

Таъкидланишича, «Маданият карвони» учун мўлжалланган махсус автотранспорт воситасини маҳаллий корхоналар (Турин политехника университети) билан биргаликда мукаммал ишлаб чиқиш, тайёрлаш ва зарур ускуналар билан жиҳозлаш чоралари кўрилиб, Вазирлар Маҳкамасининг қарорига асосан тўғридан-тўғри шартнома тузилган.

Шу ўринда бундай автотранспорт воситасининг афзаллиги ва муҳимлиги нимада деган савол туғилиши табиий. Айтиш жоиз, аслида бу кўпчилик ўз тасаввурига кўра тахмин қилиб, турлича талқин этаётган енгил автомобиль эмас. Номидан ҳам англаш мумкинки, бу тегишли мусиқа техникаси ва саҳнага эга махсус автотранспорт воситасидир. Бошқачароқ қилиб уни замонавий, улкан «Мобил саҳна» дейиш ҳам мумкин. Бундай транспорт воситалари буюртма асосида махсус ишлаб чиқарилади. Тасаввур қилинг, шаҳар ёки туман марказида уюштириладиган концерт дастурини келиб кўришга ҳамманинг ҳам имконияти етмаслиги мумкин. Лекин бунга чекка ҳудудларда истиқомат қилаётган юртдошларимиз маданий ҳордиқ чиқаришдан ўзлари мосуво бўлишди, деб қараб туриб бўлмайди. Бу тўғри хулоса эмас. Уларнинг ҳам концерт кўришга, завқланишга ҳаққи бор. Шу маънода, юқорида айтиб ўтилган махсус автотранспорт воситаси жуда қўл келади, — дейди Озодбек Назарбековнинг матбуот котиби Орифжон Файзиев.

Асосий мақсад халқимизга хуш кайфият улашиш, ҳаммага бирдек маданий ҳордиқ чиқариш учун шарт-шароит яратиш, — дейди вазирлик масъуллари.