Нима сабабдан қиролича Елизавета II ҳар доим омма олдида шляпада кўриниш берган?

Деярли ҳар сафар Елизавета II омма олдида кўриниш берганида, ундаги иккита нарса ўзгаришсиз қолган: ёрқин рангдаги либос ва унга мос шляпа. Маълум бўлишича, қиролича 70 йиллик ҳукмронлик даврида 5000 га яқин шляпа кийган. Хўш, нима учун бу бош кийими қиролича гардеробининг муҳим қисмига айланган? «Новий очаг» нашри ушбу саволга жавоб берди.

Маълум бўлишича, қироличада мода тенденциялари билан боғлиқ бўлмаган алоҳида сабаб бор эди.

Елизавета II нинг шляпаларга бўлган меҳрини шу билан изоҳлаш мумкинки, ҳашаматли либослар ва гардероб буюмларининг санъаткорона уйғунлигига кўра, малика ҳар гал омма олдига чиқса, ўзига хос униформа кийган.

Британиялик тарихчи Роберт Лейси ўзининг «Қироллик услуби ҳақида мулоҳазалар» («HRH: So Many Thoughts on Royal Style») китобида буни шундай тушунтиради. «Жуда кам сонли замонавий аёллар иш кийимининг бир қисми сифатида шляпа кияди, эҳтимол, ҳарбий хизматдагилардан ташқари. Шляпа, ўз навбатида, қиролича хизматда, ишда эканини эслатади.

— Шляпа, тушунганингиздек, монархнинг жуда муҳим кийими ҳисобланади. Айтиш мумкинки, у тожнинг ўрнини босувчи ўзига хос элемент эди», — дея қўшимча қилади Лейси.

АBC News хабарига кўра, Елизавета II нинг расмий шляпа тикувчиларидан бири Фредди Фокс қиролича учун юзлаб шляпалар тиккан. Улар шунчалик кўп бўлганки, у фақат бош кийимлар ўрин олган алоҳида вагонда саёҳат қилган. «У ўзини қулай ҳис қиладиган ва яхши кўринишга эга нарсаларни кияди. Ахир бу энергияга бой ва меҳнатсевар хонимнинг униформаси эди», — дейди Фокс.

2016 йил суратга олинган «Қиролича 90 ёшда» ҳужжатли фильмида уэссекслик Софи нима учун қайнонаси ҳар доим ёрқин рангли шляпа кийиб юришини маълум қилди. «Одамлар биз қироличани кўрдик, дейишлари учун у ажралиб туриши керак», — деб тушунтирди графиня. Шунингдек, шляпа қироличанинг бўйини баландроқ қилиб кўрсатиши, тадбирдаги барчага уни кўришни осонлаштирганини айтиб ўтган.

Елизавета II нинг оммавий чиқишларида жуда кўп оломон бўлар ва орқадаги одамлар қиролича ўтиб кетаётганида унинг шляпасининг камида бир қисмини кўриш имконига эга эди.

«Қиролича дунёдаги энг бадавлат аёллардан бири бўлишига қарамай, у ўзининг севимли шляпаларини 20, ҳатто 30 марта кийган, — дейди инглиз дизайнери Филип Сомервилл. — Бироқ у ёқтирмаган нарсаларини бир мартадан кўп кийишни хоҳламаган».