Донецкда темир йўлчилар офисига HIMARS’дан зарба берилди, Киевда рус армиясидан қолган қурол ва кийим-кечаклар сотилмоқда. Урушнинг 257-кунидан фоторепортаж
Американинг Махар компанияси сунъий йўлдошдан олинган тасвирлар таҳлили ёрдамида Мариупол яқинида 1500 дан ортиқ янги қабрлар борлигини аниқлади (уруш бошланганидан бери мутахассислар шаҳар ва унинг атрофида 4600 дан ортиқ қабр топган). Россия ҳукумати маълумотларига кўра, Украина Қуролли кучлари «Донецк темир йўли» маъмуриятига зарба берган, қурбонлар йўқ. Владимир Путиннинг айтишича, сафарбар қилинган россияликларнинг 80 мингга яқини аллақачон урушга юборилган, улардан 50 мингга яқини жанговар ҳаракатларда қатнашмоқда. Херсон вилоятининг қўшиб олинган қисмида Россия томонидан тайинланган маъмурият «ўнг қирғоқдан одамларни эвакуация қилиш» тугаганини эълон қилди.
Донецкдаги темир йўлчилар офисига берилган зарба оқибатлари
Тунги ўққа тутишлар оқибатида «Донецк темир йўли» маъмуриятида ёнғин содир бўлди. Россия расмийларига кўра, Украина Қуролли кучлари бинога камида бешта HIMARS снарядларини отган. Қурбонлар ҳақида маълумот йўқ. Украина ҳодисага изоҳ бермади.Фото: «ТАСС»
Донецкда балконига Россия байроғи илинган аҳоли вакили.Фото: Reuters
«Донецк темир йўли» маъмурияти устидан кўтарилган тутун. Оккупацион ҳокимият маълумотларига кўра, бинога — девор ва томга камида иккита HIMARS снарядлари келиб тушган.Фото: Reuters
Лимандаги турар жой биносига ҳужум оқибатлари
7 ноябрь куни Россия томонидан ўққа тутилган тўққиз қаватли турар жой биносида ўт ўчирувчилар ишламоқда. Россия истилосидан озод қилинган Лиман бир ойдан ортиқ вақтдан бери Украина назоратида — Донецк вилоятида аҳоли пунктлари учун жанглар тўхтамаяпти.Фото: AP Photo
Бинонинг бурчак қисми биринчи қаватдан саккизинчи қаватгача вайрон қилинган. Қутқарувчилар биринчи қаватдан бир аёлни эвакуация қилди, қурбонлар ва жароҳатланганлар ҳақида маълумот йўқ.Фото: AP Photo
Фронтга яқин Авдеевкадаги ҳаёт
Ўққа тутилган кўп қаватли уй. Авдеевка Донецк вилоятида рус аскарлари ҳозир босиб олишга уринаётган шаҳарлардан бири. Шаҳар мунтазам бомбардимон қилинмоқда. Жумладан, 12 октябрь куни рус армияси Авдеевка марказий бозорига ҳужум қилиб, етти кишини ўлдирганди.Фото: Reuters
Авдеевкада яшовчи киши ўтинга ярайдиган ёғочларни велосипедига ортмоқда. Шаҳарда сув, электр ва газ йўқ. Украина Миллий полициясига кўра, 30 мингдан ортиқ аҳолидан 1500 нафари Авдеевкада қолмоқда.Фото: Reuters
Сув ташиётган киши.Фото: Reuters
Уруш бошидан бери Россия томонидан бир неча бор ҳужумга учраган Авдеевка кокс кимёвий заводининг кўриниши. Ҳарбий ҳаракатларга яқин жойлашгани сабаб завод ишлашдан тўхтаган.Фото: Reuters
Одамлар жон сақлайдиган ертўлада авдеевкалик кекса аёл.Фото: Reuters
Киевдаги топилмалар дўкони
Киевдаги Эх Team дўконида илгари фаол спорт турлари учун жиҳозлар сотиларди. Россия босқини бошланганидан бери бу ерда Украина армияси томонидан топиб олинган ҳарбий буюмларни ҳам сотиб олиш мумкин. Уларни сотишдан тушган пул Украина Қуролли кучларида хизмат қилаётганлар учун ҳарбий техника сотиб олишга кетади.Фото: EPA
Танкка қарши гранаталардан бўшаган трубалар.Фото: EPA
Сотувчи Россия ҳарбий формасини кўрсатмоқда.Фото: EPA
Изоҳ (0)