Bloomberg: АҚШ ҳукумати банклардан Россиянинг айрим компаниялари билан ҳамкорликни давом эттиришни сўради

АҚШ молия вазирлиги ва Давлат департаменти хусусий равишда йирик банкларни «айрим стратегик Россия компаниялари» билан ҳамкорлик қилишдан бош тортмасликка чақирмоқда. Бу ҳақда Bloomberg хабар бермоқда. 

Сўров JPMorgan ва Citigroup’га йўналтирилган. Улардан «Газпром», «Уралкали» ва «Phosagro» каби компанияларга асосий хизматлар кўрсатишдан бош тортмаслик сўралади.

Bloomberg сентябрь ойида JPMorgan бош директори Жейми Даймон конгрессдаги тингловда санкцияларни четлаб ўтиш, хусусан, «Газпром» билан бизнес юритиш учун бўшлиқлардан фойдаланганликда айбланганига эътибор қаратди. 

Биз Америка ҳукуматининг кўрсатмаларига амал қиламиз, чунки улар биздан буни қилишни сўраган, — деган эди Даймон

Агентлик маълумотларига кўра, Жо Байден маъмуриятининг яширин ҳаракатлари санкцияларнинг салбий оқибатларини камайтиришга қаратилган. 

Таъкидланишича, АҚШ расмийлари шу йўл билан «глобал иқтисодий фалокат»дан қочишга ҳаракат қилмоқда. 

Бунинг учун АҚШ Ғазначилик ва Давлат департаменти банклардан Россиянинг айрим банкларига пул ўтказмалари ва долларга конвертация қилиш каби «асосий хизматлар»ни кўрсатишни давом эттиришни сўраган. 

JPMorgan ва Citigroup аввалроқ Россиядаги бизнес фаолиятини тўхтатаётганини эълон қилган эди. Июль ойида Украина АҚШ ва Европанинг йирик банкларини Россия нефти билан савдо қилувчи компаниялар билан алоқаларни узишга чақирди. 

Киев уларни ҳарбий жиноятларда айблади. Мактублар Американинг JPMorgan Chase, Citigroup, Британиянинг HSBC ва Франциянинг Credit Agricole компанияларига юборилган.