Ўзбекистонда хизмат кўрсатган артист Азим Муллахонов «Дарё» интернет нашрининг YouTube’даги каналига интервью берди. Бир неча йилдан буён у «Ўзбекконцерт» давлат муассасаси қошида ташкил этилган ижодкорларга лицензия бериш бадиий кенгашида фаолият юритаётгани ва иқтидори у қадар юқори бўлмаган хонандалар қандай қилиб, «синов»лардан ўтишаётганига изоҳ берди.
— Ҳамма ижодкорлар бирдан яхши ижрочи бўлиб қолмайди. Каниза Ўзбекистон давлат консервоториясини тамомлаган. Унинг ҳам ўзига яраша йўналиши бор. Уни ҳам қоралаб бўлмайди. Чунки унинг ҳам қилаётган ишлари бир изланиш.
«Қандай қилсам ўз йўналишимни топаман», деган фикрлари бор. Унинг тўйлардаги видеолари тарқаб одамларнинг у ҳақидаги фикри ўзгарган. Аммо бошқа томондан қараганда, менинг ҳам ўзимга яраша ёмон томонларим бор.
Ёдгор Саъдиев бир учрашувда «Санъаткорнинг ўзига яраша сир-асрори қолиши керак. Ҳамма нарсани айтиб юбориши керак эмас», деганди. Кейинги пайтларда кўп санъаткорлар ҳаётидаги ички сирларни ҳам халққа кўрсатишяпти. Шу сабабданми халқимизнинг баъзи санъаткорлар ҳақидаги фикри ўзгариб қолган.Канизада ўзига яраша иқтидор бор, агар йўқ бўлганида у умуман қўшиқ айтолмасди. Беш бармоқ баробар бўлмаганидек, ижрочилар ҳам турлича бўлади. Сал бундайроқ қўшиқ айтадиганларни ёки халқнинг қулоғига қўшиғи ғализ эшитиладиганларни четга суриб қўёлмаймиз. Бундай санъаткорларнинг ҳам ижод қилишга ҳаққи бор, — дейди хонанда Азим Муллахонов.
Азим Муллахонов бир неча йилдан буён республика санъат кўрик танловларида ва давлат мукофотларида ҳайъат аъзоси сифатида иштирок этади. «Мукофотлар ўз эгаларига топширилаяптими?» деган саволга қуйидагича жавоб берди.
— Танловларда ҳар доим ҳам ҳайъат аъзоларининг хоҳиши рўёбга чиқмайди. Танлов давомида ғолибларни олдиндан тахмин қиламиз, аммо натижалар умуман бошқача бўлади. Бир неча марта давлат мукофотлари ва кўрик танловларида шундай ҳол такрорланди. Ҳамма гапларимни йиғиб юрибман, албатта, уларни айтаман. Танловлар мусаффо бўлиши керак, ёшлар санъатга қизиқдими ҳаққоний йўл билан ғалаба қозониши керак. «Ниҳол» номидаги давлат мукофотининг саралаш босқичларида бир неча бор иштирок этдим. Гувоҳ бўлганим, унчалик яхши ижро қилмаган йигит-қизлар давлат мукофотини қўлга киритган вазиятлар ҳам бўлди. Ҳатто, ўша ижодкорлар иштирок этадиган гала-концертларга мени таклиф этишмади. Аммо қўлим билан ушламагандан кейин бу ҳақида гапириш қийин. Аммо бир нарсани аниқ айтоламанки, шу ишни қилаётган инсонлар ҳаромдан пул топаяпти, эртами-индин бу қинғирликлар ошкор бўлади. Ўзбек санъати оғир аҳволда турган пайтда бундай қилиб, уни яна да таназзулга юз тутишига сабабчи бўлиш оғир гуноҳ, — дейди хонанда Азим Муллахонов.
Мавзуга доир: «Шайтанат’ қўшиғи уч кунда тайёр бўлган». Азим Муллахонов машҳур қўшиғининг яратилиш тарихи ҳақида (видео)
Изоҳ (0)