Қашқадарё вилоятининг Қамаши туманида 11-синф ўқувчиси депутат ва унинг ўғиллари томонидан ўласи қилиб калтаклангани айтилмоқда.
«Дарё» калтакланган ўқувчининг отаси Бахтиёр Қиличев билан боғланди. Айтилишича, воқеа кеча, 3 ноябрь куни вилоятнинг Қамаши туманидаги «Қамай» МФЙ «Мирзадала» қишлоғида содир бўлган.
Ўғлим ҳам ёшлик қилган, тўғри, буни инкор қилмайман. Аммо кап-катта одам, депутат ёш болани ўғиллари билан бирикиб, ўласи қилиб уриши тўғрими? Ўғлим ўлиб қолса нима бўларди?, — дейди калтакланган ўқувчининг отаси Бахтиёр Қиличев.
Калтакланган боланинг отасига кўра, унинг фарзанди Элшод Келдиёров депутатнинг набираси билан учрашувга чиққан.
Депутатнинг уйи ёпиқ ва кириш имкони бўлмаган уй. Унинг набираси ва ўғлим учрашувга чиққан. Қиз ўғлимни уйига киритган. Буни депутат кўриб қолган ва икки нафар ўғли билан 11-синф ўғлимни ўлгудек калтаклаган. Ўғлим қон қусган. Ҳозир шифохонада даволанмоқда, — дейди калтакланган боланинг отаси.«Дарё» ўқувчини калтаклагани айтилган депутат, Панжи Нуртоев билан телефон орқали боғланиб, ўқувчини калтаклашининг сабаби билан қизиқди.
Депутат журналист сўровига жавобан уни ҳақорат қилиб, тилга олиб бўлмайдиган сўзлар ишлатган. Ва саволларга жавоб бермаган. «Дарё» депутатнинг ахлоқсиз сўзлари ва журналистни ҳақорат қилгани борасида алоҳида тўхталади.
Изоҳ (0)