Ўзбекистонда Payme, Click, Апельсин ва бошқа тўлов ташкилотларининг муҳим функциялари ишлашдан тўхтади. Давлат солиқ қўмитаси бу бўйича муносабат билдирди.
Маълум қилинишича, тўлов тизимлари операторлари ўз тўлов тизимларини онлайн НКМга мажбурий равишда улаш ва шу орқали солиқ органларининг ахборот тизимларига 2022 йил март ойидан интеграциялашни таъминлаш талаби ўрнатилган.
Аҳоли билан пуллик ҳисоб-китобларни амалга оширишда электрон тўлов тизими орқали электрон фискал чек тақдим қилиш тартиби белгиланган.
Шунингдек, мавжуд 48 та электрон тўлов ташкилотидан 25 таси фискал маълумотлар операторига интеграцияни тўлиқ якунлаган.
Давлат солиқ қўмитасига кўра, ҳозирги кунда харидлар учун тўловларни аксарият ҳолларда P2P (картадан картага ўтказиш) қилиш кузатилмоқда.
Мамлакат иқтисодиётини узоқ муддатли ривожлантириш борасида кенг кўламли ислоҳотлар амалга оширилаётган шароитда ахборот технологиялари воситасида истеъмолчилар, тадбиркорлик субъэктлари ва давлат солиқ хизмати органларининг уйғунлашган фаолияти алоҳида аҳамият касб этади, — дейилади хабарда.
Маълум қилинишича, ўтган йилнинг мос даврига нисбатан харид чеклари сони 185 фоизга харид суммаси эса 176 фоизга ошган.
Аввалроқ Ўзбекистонда харид чекини рўйхатдан ўтказганларга тўланган кэшбэк 330 млрд сўмдан ошгани ҳақида хабар берилганди.
Изоҳ (0)