«Вагнер» хусусий ҳарбий компанияси Украинадаги урушга Афғонистон армиясининг элита махсус бўлинмалари вакилларини ёлламоқда, улар америкалик инструкторлар томонидан ўқитилган ва ҳокимият тепасига «Толибон» ҳаракати келганидан кейин ишсиз қолган. Бу ҳақда Foreign Policy махсус бўлинмалар орасидаги манбаларига таяниб хабар берди.
Таъкидланишича, 2021 йил августида, толиблар Афғонистонда ҳокимиятни эгаллаб олгач, АҚШ махсус бўлинмалардан бир неча юз нафар катта офицерларни эвакуация қилган, холос, 20 дан 30 минг кишигача бўлган жангчилар эса тақдир ихтиёрига ташлаб қўйилган. Улар қўшни мамлакатларга қочишга ёки яширинишга мажбур бўлган, чунки «Толибон» АҚШ ва аввалги афғон ҳукумати билан ҳамкорлик қилган ҳарбийлар изига тушиб, уларни ўлдирган.
АҚШ Конгрессида Афғонистондан эвакуация чоғида йўл қўйилган хатоликларни муҳокама қилиш чоғида америкаликлар томонидан ташлаб кетилган афғон махсус бўлинмалари жангчилари «АҚШ хавфсизлигига таҳдид солиши мумкинлиги», чунки Вашингтонга душман мамлакатлар томонидан ёлланиши мумкинлиги ҳақида хавотирлар билдирилган эди.
Foreign Policy манбалари ҳисоб-китобларига кўра, «Вагнер» гуруҳига 10 минг нафаргача афғон жангчилари қўшилиши мумкин, чунки уларнинг «йўқотадиган ҳеч нарсаси йўқ», шу билан бирга, уларнинг кўпчилиги толиблар режими билан муносабатларни йўлга қўяётган Россияни Афғонистоннинг душмани деб ҳисоблайди.
«Улар Покистон ёки Эронда кунига 3—4 доллар ё бўлмаса, Туркияда кунига 10 доллар эвазига ишлашга тайёр. Агар ‘Вагнер’ ёки ким бўлса ҳам, бу одамнинг олдига келиб унга 1000 доллар таклиф қилса, у яна жанг қилишдан бош тортмайди. Агар сиз бир кишини ёлласангиз, у эски бўлинмасининг ярмини ўзи билан олиб келади», — деди нашр манбаларидан бири.
Foreign Policy қайд этишича, умуман олганда, Афғонистон хавфсизлик кучлари АҚШ кетганидан кейин том маънода бир неча ҳафта ичида мамлакатни толибларга бериб қўйиб, ўз қобилиятсизлигини кўрсатган бўлса-да, махсус бўлинма жангчилари доим яхши профессионаллар ҳисобланган, чунки улар Америка ва Британиянинг элита бўлинмалари инструкторлари томонидан тайёрланган. Нашр манбаларидан бири тахмин қилишича, афғонларнинг Украинадаги жанг майдонида пайдо бўлиши «ўйин қоидаларини ўзгартириши» мумкин.
«Улардан Ғарбдаги иттифоқдошлар фойдалангани, улар украиналиклар томонида туриб жанг қилгани яхшироқ эди. Улар руслар учун жанг қилишни истамайди, руслар — душманлар. Лекин улар нима ҳам қила оларди?» — деди нашрнинг яна бир суҳбатдоши.
Вагнер гуруҳи ўзи қандай гуруҳ?
Вагнер гуруҳи биринчи марта Украинада 2014 йилда пайдо бўлган ва Россиянинг Қримни эгаллаб олишида муҳим рол ўйнаган эди.Унга махсус топшириқли бўлинма собиқ жангчиси Дмитрий Валерьевич Уткин асос солган деб ҳисобланади, у гуруҳга Гитлернинг севимли композитори Ричард Вагнернинг номини берган.
Кўплаб Ғарб ОАВлари Вагнер гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.
Изоҳ (0)