Тошкент вилояти халқ таълими бошқармаси бошлиғи Азамат Камолов суд қарорини бажаришдан бош тортгани учун 4,5 миллион сўм миқдоридаги жаримага тортилди. Бу ҳақда Ўзбекистон Инсон ҳуқуқлари «Эзгулик» жамияти раиси Абдураҳмон Ташанов Facebook‘даги саҳифасида хабар берди.
Ташановнинг ёзишича, Тошкент вилоятидаги мактаб директори Саида Ҳошимова аввалига туҳмат билан судланган. Сўнг Олий судгача чиқиб, оқланган. Ва лавозимига тикланиши бўйича суд қарори ҳам чиққан. Бироқ, вилоят халқ таълими бошқармаси бошлиғи Ҳошимовани ишига тикламаган.
Саиданинг ҳам оиласи бор, бола-чақаси бор. Ишсиз, туҳмат билан судланди. Унинг ҳаётини издан чиқарган, бошига итнинг кунини солган муттаҳамлар ишлаб юрибди, жавобгар бўлгани йўқ. Шундай экан, бизга қарори бажарилмайдиган, сўзи латта кесмайдиган судлар нега керак? Уларни боқиб нима қиламиз, анархияга кўниб қўя қолсак бўлмайдими?, — дея фикр билдирганди Абдураҳмонов Ташанов воқеа аввалида.Бугун вазият ҳақида қўшимча ахборот берган Facebook фойдаланувчисининг ёзишича, Мажбурий ижро бюросининг Тошкент вилояти Ўрта Чирчиқ тумани бўлинмаси вилоят халқ таълими бошқармаси бошлиғи Азамат Камоловни суд қарорини бажармагани учун базавий ҳисоблаш миқдорининг 15 баравари (4 500 000 сўм) миқдорида жаримага тортган.
Изоҳ (0)