Севастопол ва Қрим футбол жамоалари 2023 йилдан бошлаб Россия миллий футбол лигаси томонидан ўтказиладиган мусобақаларда ўйнаш ҳуқуқига эга бўлади. Бу ҳақда Севастопол губернатори Михаил Развожаев маълум қилди.
Агар ушбу маълумот ўз тасдиғини топадиган бўлса, Россия футболи яна санкциялар ичида қолиши мумкин.
Россиянинг Украинадаги ҳарбий ҳаракатлари сабаб мамлакат терма жамоаси ва маҳаллий клублар УЕФА ҳамда ФИФА тасарруфидаги мусобақалардан четлатилди. Бироқ Россия футбол иттифоқи (РФС) ҳали ФИФА ва УЕФА аъзоси ҳисобланади. Бунинг эвазига клублар трансфер бозорида фаолият олиб бориш, терма жамоа эса халқаро ўртоқлик ўйинларида иштирок этиш ҳуқуқига эга.
Аннексия қилинган ҳудудлардаги клубларнинг Россия чемпионатларига қўйилиши ортидан мамлакат футболчи ФИФА ва УЕФА тизимидан буткул чиқариб ташланиши мумкин. Шундан бўлган тақдирда терма жамоа ўртоқлик ўйинлари ўтказа олмайди, рус клублари эса халқаро трансфер тизимидан чиқариб юборилади ва клублардаги барча футболчилар шартномани бекор қилиш ҳуқуқига эга бўлади. Шунингдек, Россия ФИФА ҳамда УЕФА томонидан футбол ривожи учун ажратиладиган ёрдам пулларидан қуруқ қолади.
Эслатиб ўтамиз, ФИФА ва УЕФА 2015 йилда Қрим футбол клубларига Россия биринчиликларида ўйнашни тақиқлаб қўйганди.
Изоҳ (0)