Ижтимоий тармоқлар орқали таълим тизимида пенсионер ходимларга ишдан бўшатиш тўғрисида огоҳлантириш хати берилаётгани ҳақида мурожаат эълон қилинди. Бандлик ва меҳнат муносабатлари вазирлиги ҳолатга муносабат билдирди.
Қайд этилишича, Меҳнат кодексининг 100-моддаси иккинчи қисми 7-бандига мувофиқ, ходимнинг пенсия ёшига тўлгани, қонунчиликка мувофиқ ёшга доир давлат пенсиясини олиш ҳуқуқи мавжуд бўлганда меҳнат шартномасини иш берувчининг ташаббуси билан бекор қилиш ҳуқуқи мавжуд.
Ўзбекистон Республикаси президентининг 2022 йил 15 мартдаги «Нуронийларни ҳар томонлама қўллаб-қувватлаш, уларнинг турмуш даражасини оширишга доир қўшимча чора-тадбирлар тўғрисида»ги ПҚ-167-сон қарорининг 3-бандида «маҳалла ва нуронийларни қўллаб-қувватлаш вазирлиги ва Бандлик ва меҳнат муносабатлари вазирлигининг ходимнинг пенсия ёшига тўлгани боис билан у билан тузилган меҳнат шартномасини иш берувчининг ташаббуси билан бекор қилиш тартибини тақиқлаш тўғрисидаги таклифига розилик берилсин» деб белгиланган.
Мазкур банддаги топшириқ янги таҳрирдаги Меҳнат кодексида акс эттирилган. Унга кўра, ходимнинг пенсия ёшига тўлгани муносабати билан у билан тузилган меҳнат шартномасини иш берувчининг ташаббуси билан бекор қилиш тартиби чиқариб ташланган.
Шунингдек, Ўзбекистон Республикасида меҳнатга оид муносабатлар меҳнат тўғрисидаги қонунчилик, жамоа келишувлари, жамоа шартномалари ва бошқа локал норматив ҳужжатлар билан тартибга солинади. Юқоридагиларга асосан ходим билан меҳнат шартномасини бекор қилишда амалдаги қонунчилик талабларига риоя қилиш мақсадга мувофиқ бўлади.
Изоҳ (0)