Андижонда янги ҳоким иш бошлади. Собиқ ҳоким Ўзбекистонни бутун дунёга шарманда қилишда айбланиб, ишдан бўшатилганди

Халқ депутатлари Андижон туман кенгашининг навбатдан ташқари сессиясида «Ўзтрансгаз» акциядорлик жамияти бошқаруви раисининг молия ва маркетинг бўйича ўринбосари Бахтиёр Маматкаримов Андижон тумани ҳокими лавозимига тайинланди. Бу ҳақда «Дарё» мухбири хабар бермоқда.

Бахтиёр Маматкаримов 1980 йил Қўрғонтепа туманида туғилган бўлиб, 2000 йилда Тошкент молия институтининг молия ва кредит, 2013 йилда Банк-молия академиясининг банк иши йўналишини, 2021 йилда Давлат бошқаруви академиясини тугатган.

Меҳнат фаолиятини 2001 йилда «Асакабанк» давлат акциядорлик тижорат банки Андижон вилояти филиали валюта шўъбаси пул алмаштириш шохобчаси кассири вазифасидан бошлаган. 2003—2020 йилларда «Асакабанк» давлат акциядорлик тижорат банки Андижон вилояти филиали кредит бўлими мутахассиси, валюта ва савдо амалиётлар бўлими бошлиғи, кредит бўлими бош мутахассиси, «Асакабанк» давлат акциядорлик тижорат банки Андижон вилояти филиали ички назорат сектори мутахассиси, жамғарма амалиётлар шўъбаси мудири, Марказий банк Андижон вилояти бош бошқармаси Тижорат банкларини назорат қилиш бўлими иқтисодчиси, Банклар ва нобанк кредит ташкилотларини назорат қилиш бўлими иқтисодчиси, «Trastbank» хусусий очиқ акциядорлик биржа банки Ички аудит бошқармаси бош мутахассиси, бошқарма бошлиғи ўринбосари, бошлиғи, Ички аудит департаменти директори, «Нефтьгазинвест» масъулияти чекланган жамияти тузилган шартномаларнинг ижросини мониторинг қилиш бўйича гуруҳи раҳбари, «ЎзЛITIнефтгаз» АЖ бошқаруви раисининг иқтисод ва молия бўйича ўринбосари вазифаларида фаолият юритган.

У 2020 йил октябрдан буён «Ўзтрансгаз» акциядорлик жамияти бошқаруви раисининг молия ва маркетинг бўйича ўринбосари лавозимида фаолият юритиб келган.

Аввалроқ 27 сентябрь куни Президент администрацияси раҳбари Сардор Умурзоқов видеоселектор йиғилишида, лавозимига нолойиқ деб топилган Андижон тумани ҳокими Абдужаббор Эгамбердиев ишдан бўшатилгани хабар берилганди.

Эслатиб ўтамиз, август ойида Андижон тумани ҳокими Абдужаббор Эгамбердиевнинг ҳокимлик биноси ҳовлисида фуқаролар учун бўлиб ўтган сайёр қабули кенг муҳокамаларга сабаб бўлганди. Унда ҳоким айвон ичида ўтириб, фуқароларни эса айвонда ташқарига ўтқазиб мулоқот қилган. Буни ҳокимлик ижтимоий масофа сақлаш учун қилинган, деб изоҳлаганди.