Украина ялпи сафарбарлик эълон қилишни режалаштирмоқда. Бу ҳақда маҳаллий нашрлар Украина Мудофаа вазирлигига таяниб хабар бермоқда. Киев Россияда эълон қилинган қисман сафарбарлик туфайли, фронтда Россия армияси сон жиҳатдан устун келишидан хавфсирамоқда.
Хабарда айтилишича, Украинада умумий сафарбарлик 24 февралдаёқ эълон қилинган бўлса-да, янги бўлинмаларни ташкил қилиш ва қуроллантириш бўйича чекланган имкониятларни ҳисобга олганда, ялпи сафарбарликка эҳтиёж бўлмаган — аммо энди вазият ўзгармоқда.
Аввалроқ Киев тўлдириш маркази бошлиғи Максимов Украина қўшинларини тўлдиришга эҳтиёж борлигини, шу сабабли ҳамма жойда ҳарбий мажбуриятга эга эркакларнинг барчасига чақириқ қоғози топширилишини айтганди.
Россияда қисман сафарбарлик 21 сентябрь куни эълон қилинди ва 300 минг киши армияга чақилиши маълум қилинди. 14 октябрь куни аллақачон 222 минг сафарбар этилгани ҳақида хабар берилди.
Украинада сафарбарлик ва ҳарбий ҳолат
Украинанинг бутун ҳудуди бўйлаб ҳарбий ҳолат Россия махсус операцияси бошланганидан кейин дарҳол, 24 февраль куни тонгда киритилган эди. Бу қарор ҳақида эълон қилаётиб, Украина президенти Владимир Зеленский фуқароларни хотиржамликни сақлашга ва уйда қолишга чақирганди. У аҳолини Украина «хавфсизлик ва мудофаа сектори тўлиқ» ишлашда давом этишига ишонтирганди.Зеленский умумий сафарбарлик тўғрисидаги фармонни ҳам имзолади.
Режим 30 кун муддатга жорий қилинган, аммо март ўрталарида Зеленский уни яна бир ойга узайтиришни таклиф қилганди. Ўшанда Олий рада давлат раҳбари 20 мартда имзолаган қонун лойиҳасини маъқуллаганди. Апрелда Зеленский худди шундай ташаббус билан парламентга мурожаат қилган, Олий рада ҳарбий ҳолатни 25 майга қадар узайтирган эди. 23 май куни Украина Олий радаси бутун мамлакат ҳудудида ҳарбий ҳолатни уч ойга узайтириш тўғрисидаги қонунни қабул қилди.
15 август куни Олий рада ҳарбий ҳолатни яна 90 кунга — 2022 йил 21 ноябргача узайтиришни маъқуллади, шунингдек, умумий сафарбарлик ўтказиш муддатини узайтириш тўғрисидаги фармонни ҳам тасдиқлади.
Ҳарбий ҳолат амал қиладиган даврда Украина ҳукумати комендантлик соати эълон қилиши, кириш ва чиқиш бўйича махсус режим ўрнатиши, фуқаролар, чет элликлар ва фуқаролиги бўлмаган шахсларнинг ҳаракатланиш эркинлигини чеклаши, шунингдек, транспорт ҳаракатини чеклаши мумкин. Бундан ташқари, мамлакатда баъзи сиёсий партиялар фаолияти тақиқланиши ёки бошқа чоралар қўлланилиши ҳам мумкин..
Изоҳ (0)