Ҳужумчи Килиан Мбаппенинг «ПСЖ» билан шартномаси спорт тарихидаги энг катта битим экани айтилмоқда.
Le Parisien нашри ўтган мавсум охирида томонлар ўртасида тузилган шартнома тафсилотлари билан бўлишди. Унга кўра, уч йил давомида ҳужумчи 636 миллион еврога қадар (солиқлар билан бирга) ишлаб олиши мумкин.
Французнинг маоши йилига 72 миллион еврони ташкил қилади. Шартнома имзолаганлик учун бонус 180 миллион бўлиб, у уч бўлакка бўлиб тўланади.
Шунингдек, Мбаппе содиқлик учун ҳам бонусга эга бўлади. 2023 йил ёзида у 70 миллион, 2024 йилда 80 миллион, 2025 йилда эса 90 миллион евро олади.
Аввалроқ Килиан Париж клубини тарк этмоқчилиги хабар қилинган, бироқ унинг ўзи бу миш-миш эканлигини айтганди.
Жорий мавсум 23 ёшли футболчи Франция чемпионатида 11 ўйинда иштирок этиб, 10 та гол ва 2 та голли узатмага муаллифлик қилган.
Изоҳ (0)