«Рома» бош мураббийи Жозе Моуриньо «Наполи»га қарши ўйиндан сўнг (0:1) ўз фикрларини билдириб ўтди.
Ютқазмаслик учун етарли даражада яхши ўйнадик. Рақиб қўллаган каби дарвозага бир нечта зарба бериб бўлса ҳам ғалаба қозонишни хоҳлардик.«Рома» А Сериянинг 11-турида «Наполи»га 0:1 ҳисобида имкониятни бой берди. Римликлар 22 очко билан 5-ўринни эгаллаб турибди. Неаполликлар эса 29 очко билан мусобақа пешқадамлигини сақлаб қолди.Учрашув қийин кечди, назоратни қўлга олдик, бироқ кўплаб сариқ карточкалардан сўнг муаммолар бошланди. «Наполи» эса иккинчи бўлимдаги кам сонли хавфли ҳужумларининг биридан фойдалана олди. Агар Кристанте огоҳлантириш олмаганда, у қарши ҳужумни эртароқ, қўполлик эвазига бартараф қилган бўларди.
Шунингдек, чарчаган футболчилар билан ҳам муаммо бўлди. Бундан ташқари жароҳатлар ҳам бор эди, муаммолар 70-дақиқадан кейин тўплана бошлади.
Адолатсизлик бўлди ва футболчиларимнинг ҳисларини тушунаман. Улар мағлубиятдан қутулиб қолиш учун қўлларидан келган барча ишни қилди. Гол урган жамоа ғалаба қозонишини билардик, буни «Наполи» амалга оширди.
Бизда сариқ карточкалар борлигига, чарчаган ва тўлиқ тайёр бўлмаган ўйинчиларга, захирада вариантлар қолмаганига қараганимда «Наполи» ҳақиқатан ҳам яхшидек туюлди.
Иккинчи бўлимда чарчоқ туфайли рақибга нисбатан босимни камайтиришга мажбур бўлдик. Спинассола доим йиқилиб тушадиган йигитни ушлаб туриши керак эди. Исми нима эди уни? Ҳар доим ерга ётиб оладиган... Лосано! Айнан!
Ҳакам ҳақида гапиришни истамайман. Менимча,у яхши ва мувозанатни сақлай оладиган одам. Кўп нарса менга ёқмади, бироқ ўйиндан кейин Иррати билан ҳаммасини муҳокама қилиб олдик, ҳеч бўлмаганда у билан гаплашиш мумкин эди. Бу унинг энг яхши ўйини бўлмади, лекин бунақа нарсалар содир бўлиб туради. Ҳамманинг ҳам омадсиз кунлари бўлади.
Ғалабага лойиқ эмаслигини ҳис қилиб турган бўлсам ҳам «Наполи»ни табриклайман. Шунингдек, мағлубиятга лойиқ бўлмай туриб, мағлуб бўлган жамоамни ҳам табриклайман.
Жозе Моуриньо, «Рома» бош мураббийи
Изоҳ (0)