Фарғона вилояти Учкўприк туманида тиббий буюмлар ноқонуний муомалага киритилишининг олди олинди. Бу ҳақда Иқтисодий жиноятларга қарши курашиш департаменти хабар берди.
Қайд этилишича, Бош прокуратура ҳузуридаги департаментнинг Учкўприк тумани бўлими томонидан тезкор тадбир ўтказилган. Унда фуқаролар Ў.Қ. ва Н.Ғ. тиббий буюмларни дорихоналардан ташқарида муомалага киритиш орқали даромад орттиришни кўзлаб, фуқаро Қ.га тегишли ҳужжатлари бўлмаган 50 минг дона «БИОЛА Биосетих Бюджет, Игла/Ине 21G» номли хорижда ишлаб чиқарилган система тиббий буюмини 115 миллион сўмга сотган вақтларида ашёвий далиллар билан ушланган.
Мазкур ҳолат юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, шунингдек дори воситаларини дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)