Сурхондарё вилояти Денов туманида 4 нафар фуқаро фойдасига 1 миллиард 424 миллион сўмдан ортиқ компенсация ундирилди. Бу ҳақда Мажбурий ижро бюроси «Дарё»га хабар берди.

Қайд этилишича, Денов тумани марказида қурилиш ишлари олиб борилиб, 4 нафар фуқаронинг уй-жойлари, ишлаб чиқариш иморатлари ва бошқа иншоотлар туман ҳокимиятининг келишув битимига асосан давлат ва жамоат эҳтиёжлари учун бузилиб, ушбу уй-жойлар учун компенсация тўлаб берилиши ваъда қилинган.

Келишув битимига асосан фуқаролар фойдасига туман ҳокимлиги томонидан компенсация пули ўз вақтида тўлаб берилмагани сабабли ушбу масала фуқаролик ишлари бўйича Денов туманлараро судида кўриб чиқилиб, туман ҳокимлиги ҳисобидан 4 нафар фуқарога жами 1 миллиард 424 миллион 867 минг сўм компенсация ундирилиши белигланган эди.

Мазкур суднинг ижро ҳужжатлари Мажбурий ижро бюроси Денов туман бўлими иш юритувига қабул қилиниб, мажбурий ижро ҳаракатларига киришилди. Мажбурий ижро ҳаракатлари давомида «Суд ҳужжатлари ва бошқа органлар ҳужжатларини ижро этиш тўғрисида»ги қонуннинг тегишли моддаларига асосан туман хокимлигига талабнома юборилиб, ҳисоб рақамларига инкассо топшириқномалари қўйилди.

Шундан сўнг туман ҳокимлиги ҳисобидан мазкур ижро ҳужжатлари бўйича фуқаролар фойдасига компенсация пуллари тўлиқ ундирилиб, ундирувчиларнинг номида очилган пластик карталарига ўтказиб берилиши таъминланди ҳамда ижро ҳужжатлари белгиланган тартибда иш юритувдан тугатилди.