Тошкентда 18 ёшли талаба қиз терроризмда айбланиб, 5 йилга қамалди

Олий Мажлис Қонунчилик палатаси депутати Расул Кушербаев ўзининг Twitter саҳифасида Жиноят ишлари бўйича Тошкент шаҳар суди 18 ёшли қизни 4 йил-у уч ойга озодликдан маҳрум этгани, қиз бу йил ОТМга ўқишга киргани, ҳатто прокурор енгиллик сўраса ҳам, суд 18 га кирган қизни «синдиргани» ҳақида ёзиб қолдирганди. Тошкент шаҳри судлари ҳолат юзасидан муносабат билдирди.

Қайд этилишича, Жиноят ишлари бўйича Юнусобод тумани судининг 2022 йил 18 августдаги ҳукмига кўра Д.Ж.:

• Жиноят кодексининг 155-2-моддаси (террорчилик фаолиятини амалга ошириш мақсадида ўқувдан ўтиш, чиқиш ёки ҳаракатланиш) 1-қисми;
• 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми «г» банди;
• 244-2-моддаси (диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) 1-қисми билан айбли, деб топилган.

Қизга узил-кесил ўташ учун 5 йил 3 ой муддатга озодликдан маҳрум қилиш жазоси тайинланган. Д.Ж. террорчилик фаолиятида иштирок этиш учун хорижга чиқиб кетиш мақсадида яқинларидан хуфиёна тарзда чемодан харид қилган. Унга кийим-кечакларини жойлаштириб, 2022 йил 15 мартда хорижга чиқиш паспортини расмийлаштиришга эришган. Уларни ўз танишининг уйида яширин равишда сақлаб келган. 2022 йил 26 март куни соат 11:00 да Ўзбекистон—Туркия—Сурия йўналиши орқали Сурияга бориб, террорчилик ташкилоти фаолиятида иштирок этиш мақсадида ҳаракат қилаётганида фош этилган ва процессуал тартибда ушланган.

Қолаверса, Д.Ж.нинг жиноят содир этишдаги айби тергов ва биринчи босқич суди жараёнларида ўз айбига тўлиқ иқрор бўлиб берган кўрсатмалари, гувоҳларнинг кўрсатмалари, уяли телефон аппаратларини текшириш учун олиб қўйиш ва кўздан кечириш баённомалари, А4 форматидаги 12 дона қоғоз варағига жойлаштирилган матнли ёзишмалар, суд-техник экспертизасининг хулосалари ва унга илова қилинган DVD+R дисклар, Вазирлар Маҳкамаси ҳузуридаги Дин ишлари бўйича қўмита экспертларининг судга оид диншунослик экспертизасининг хулосалари ҳамда жиноят иши ҳужжатларида мавжуд бўлган бошқа объектив далиллар мажмуи билан ўз исботини тўлиқ топган.

Бу билан Д.Ж.га оид суд қарорлари энди ўзгармайди, дейишдан мутлақо йироқмиз. Зотан, Тошкент шаҳри суди томонидан чиқарилган ажримдан норози тарафлар жиноят-процессуал қонунчилигида белгиланган тартиб ва муддатларда Олий судга кассация тартибида шикоят бериш ёки протест келтиришга ҳақли экани маълум қилинади, — дейилган баёнотда.