Родриго «Эль-Класико»да сўнгги 106 йилликдаги рекорд натижани қайд этди

«Реал» ҳужумчиси Родриго Ла Лига 9-тури доирасида кечган «Барселона»га қарши ўйинда (3:1) ўзига хос натижа қайд этди.

Родриго учрашувнинг 90+1-дақиқасида пенальтидан унумли фойдаланиб, ўз ҳисобига гол ёздириб қўйди. Бразилиялик 1916 йилдан кейин «Эль-Класико»да пенальтини муваффақиятли амалга оширган энг ёш футболчига айланди.

Футболчи 21 ёш-у 280 кунлигида пенальтидан гол урди. Аввалги рекорд «қаймоқранглилар»нинг афсонавий футболчиси ва собиқ президенти Сантьяго Бернабеуга (20 ёш-у 310 кун) тегишли эди.

Шунингдек, Родриго класиколарда ўзи пенальти ишлаб, ундан муваффақиятли фойдаланган тўртинчи футболчига айланди (статистика 2003/04 йилги мавсумдан бери ҳисоблаб келинади). Ундан аввал Криштиану Роналду (2014), Луис Суарес (2018) ва Серхио Рамос (2020) ушбу натижани қайд этганди.

Родриго жорий мавсум барча мусобақаларда 12 та ўйинда иштирок этиб, 5 та гол ва 3 та голли узатмага муаллифлик қилди.