«Чолиқуши» сериалидаги Фериде образи орқали дунёга танилган актриса, модель Айдан Шенер умрининг кўп қисмини кино оламга бағишлади. «Lisa.ru» нашри актриса машҳурликка эришмасидан олдин қандай ҳаёт кечиргани ва «Чолиқуши» сериалида суратга тушганидан кейинги ҳаёти ҳақида маълумот берди.
Шон-шараф йўлида
Айдан 1963 йилнинг март ойида Туркиянинг Килис шаҳрида камбағал, бироқ ижодкор оилада туғилган: унинг отаси мусиқани яхши кўрган ва мусиқашунос бўлган. Актрисанинг аждодлари Қозонда яшаган, бироқ улар насронийликни қабул қилишни истамагани учун Туркияга кўчиб ўтган. Шунинг учун Шенерда нафақат туркий, балки татарларнинг ҳам қони бор.
Актриса 18 ёшида «Туркия гўзали» танловида ғолибликни қўлга киритган. Бу танловда иштирок этганидан бир йил ўтиб Айдан «Дунё гўзали» танловига боради, бироқ биринчи ўринни венесуэлалик гўзалга бой беради.
Шенер реклама роликларида рол ўйнади, мода журналларининг муқоваларида суратга туша бошлади ва ота-онаси қизининг барча уринишларини қўллаб-қувватлади. Орадан кўп ўтмай турк кино ижодкорлари ҳам ёш ва гўзал қизга эътибор қаратди.
Актриса 1983 йилда «Кичкина хўжайин» сериалида бош ролни ижро этди. Бироқ актрисанинг юлдузлик вақтлари бу фильмда суратга тушгандан уч йил ўтиб келди — у 1986 йилда «Чолиқуши» сериалида суратга тушди. Сюжетга кўра, унинг қаҳрамони Фериде амакиси ва холасининг қўлида тарбияланган етим фарзанд. Зўравон ва қувноқ хулқ-атвори учун қизга «чолиқуши» лақабини беришади.
Фериде холасининг ўғли Камронни жуда яхши кўради, аммо буни тан олишдан қўрқади. Бир-бирига кўнгил қўйган жуфтлик турмуш қурмоқчи бўлади. Бироқ қаҳрамон севгилиси уни алдаганини билиб қолади ва бошқа шаҳарга қочиб кетади. Фериде у ерга бориб қизлар ўқитиладиган мактабда дарс беради. Бироқ у севгилиси Камрон билан янги учрашувдан қочиб қутила олмайди. Айтганча, Шенер ўз қаҳрамонига жуда ўхшашлигини айтган. Ахир, у ҳам аёллар, айниқса, мусулмон аёлларнинг ҳақ-ҳуқуқлари, адолат учун курашган.
«Мен мусулмонман, Яратгувчига ишонаман, Аллоҳ билан алоқам борлигини ҳис қиламан. Бироқ мен рўмол ва айниқса паранжи ўрашда ҳеч қанақа маъно кўрмаганман. Агар Аллоҳ менга гўзаллик берган бўлса, нега уни яширишим керак? Мен тенглик тарафдориман. Замонавий Туркияда қизларнинг таълим олишини тақиқлаш керак, деб баҳслашишда давом этиш мен учун ваҳшийлик. Ўйлайманки, агар ремейкни эмас, «Чолиқуши» фильмининг давомини суратга олишганида, қаҳрамоним Фериде билим олишга интилган қизларнинг ҳуқуқларини ҳимоя қилган бўларди», — дейди актриса.
Актрисанинг сериалдан кейинги ҳаёти
Бир нечта муваффақиятли лойиҳалардан сўнг, кўплаб режиссёрлар Айдан билан ҳамкорлик қилиш истагини билдирди. Актриса бошқа «Чолиқуши» сериалида ижро этган образидек рол олмади. Томошабинлар уни «Сомон йўли», «Истанбулнинг икки юзи» ва бошқа сериалларда кўришлари мумкин.
Айтганча, Айдан 2004 йилда отаси билан бирга Қозонга, ота-боболарининг ватанига ташриф буюрган ва 2007 йилда яна бир бор III Халқаро мусулмон фильмлари «Олтин минбар» фестивалининг ёпилишида иштирок этиш учун борган.
Шенер 1983 йилда футболчи Айхан Акбинга турмушга чиққан. Орадан беш йил ўтиб жуфтликнинг Эже исмли қизи туғилган. Бироқ улар орадан кўп ўтмай ажрашди, чунки Айданнинг турмуш ўртоғи у билан кўп вақтини ишга ажратгани сабабли келиша олмади.
Айхан рафиқасининг уйда ўтиришини, ҳар томонлама унга бўйсунишини, шунингдек, у кўплаб мухлисларидан рашк қилгани учун турмуш ўртоғининг паранжи ўрашини хоҳлар эди. Эркинликни севувчи актриса саккиз йил давомида бу муносабатга чидади ва кейин ажрашишга қарор қилди.
Айдан Шенер иккинчи марта турмушга қурмади. Актриса бугунги кунда фильмларда кам рол ўйнайди: у қизи билан кўпроқ вақт ўтказишга ҳаракат қилади ва ҳайвонларга ёрдам беради.
Мавзуга доир:
- Қамоқ ва муваффақиятсиз шахсий ҳаёт: «Чолиқуши» сериали қаҳрамонларининг тақдири қандай кечди? (фото).
- 58 ёшни қаршилаган «Чолиқуши» сериали юлдузи Айдан Шенер ҳақида 7 факт (фото).
- «Чолиқуши» сериали юлдузи – Айдан Шенер экранларга қайтмоқда.
- Уч марта саҳналаштирилган машҳур асар. Туркиянинг «Чолиқуши» сериали ҳақида қизиқарли фактлар.
Изоҳ (0)