Тожикистон президенти Эмомали Раҳмон Россия президенти Владимир Путиннинг 70 йиллик юбилейига олиб борган меваларнинг барчаси Санкт-Петербургдаги болалар уйларига тарқатиб берилди. Уларни ташиш учун олтита юк машинаси керак бўлди. Бу ҳақда Россия президенти ишлари бошқармаси «ВКонтакте»даги саҳифаси орқали хабар берди.
Таъкидланишича, бу Россия раҳбари Владимир Путиннинг топшириғига кўра амалга оширилган.
2022 йил 7 октябрь куни Санкт-Петербургдаги Константин саройида МДҲ давлатлари раҳбарларининг норасмий учрашуви ўтказилганди. Ўша куни Путиннинг 70 йиллик юбилейи эди. Шу муносабат билан Эмомали Раҳмон унга Тожикистондан келтирилган меваларни тортиқ қилди.
Эмомали Раҳмоннинг совғаси Константин саройида тарвузлар ва қовунлардан иборат иккита пирамида кўринишида намойиш этилди, қолган мевалар ушбу пирамидалар атрофига териб чиқилди.
Таъкидлаш жоиз, Туркманистон президенти Сердар Бердимуҳамедов ҳам россиялик ҳамкасбига 30 қути мева-сабзавотлар совға қилганди, аммо уларнинг тақдири ҳозирча номаълум.
Изоҳ (0)