Бош прокуратура департаменти Тошкент ва Самарқанддаги банкларда пул маблағларининг талон-торож қилиниши бўйича аниқланган қонунбузилиш ҳолатлари ҳақида маълумот берди.
Департаментнинг Тошкент шаҳри Сергели туман бўлими томонидан АТБ InfinBank Сергели филиалининг мурожаатига асосан ўтказилган терговга қадар текширувда, фуқаро Х.П. ва бошқалар, ўзаро тил бириктириб, ушбу банк филиалидан ажратилган 408,8 миллион сўм кредит ҳисобидан харид қилинган 5 дона Nexia-3 ни сохта ҳужжатлар орқали гаровга қўйилишини таъминламасдан бошқа шахсларга сотиб юбориб, ушбу маблағларни ўзлаштириш йўли билан талон-торож қилгани аниқланган.
Департаментнинг Самарқанд шаҳар бўлими томонидан АТ «Халқ банки» Самарқанд вилоят амалиёт бўлимининг мурожаатига асосан ўтказилган терговга қадар текширувда аниқланишича, ушбу амалиёт бўлими масъул шахслари кредит ва унга тенглаштирилган операциялар бўйича таъминотни танлаш ва қабул қилиш тўғрисидаги талабларга амал қилмаганликлари оқибатида «Ж.Ч.» МЧЖга савдо ва айланма маблағларини тўлдириш учун ажратилган 1,8 миллиард сўм кредит маблағлари мақсадсиз сарфланиб, ўзлаштириш йўли билан талон-торож қилинган.
Шу каби, департаментнинг Самарқанд вилояти Пайариқ туман бўлими томонидан ўтказилган терговга қадар текширувда, «П.I.» МЧЖ иш бошқарувчиси М.Э. ҳудудий тижорат банки филиалидан имтиёзли шартлар асосида 6 нафар фуқарога ажратилган 166,7 миллион сўм кредит маблағи эвазига наслли чорва молини етказиб бермасдан, кредит маблағларини ўзлаштиргани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланклар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)