Фарғонада ота фарзанди учун қарийб 112 млн сўм алимент пулини олдиндан тўлаб берди

Фарғона вилоятининг Учкўприк туманида қарздор ота 1 нафар фарзанди учун салкам 112 миллион сўм алимент пулини олдиндан тўлади.

МИБ Фарғона вилояти бошқармасининг маълум қилишича, бюронинг Учкўприк тумани бўлими иш юритувида фуқаролик ишлари бўйича Қўқон туманлараро судининг 2019 йил 18 июлдаги суд буйруғига кўра, қарздор А.А.дан ундирувчи К.М.нинг фойдасига 1 нафар фарзандининг вояга етгунига қадар ойлик даромадининг 1/4 қисми миқдорида алимент ундириш ҳақидаги ижро ҳужжати мавжуд бўлган. Давлат ижрочиси томонидан қарздорга унинг ҳуқуқ ва мажбуриятлари тушунтирилган.

Қарздор А.А. 2022 йил 22 сентябрь куни ундирувчи К.М. билан ўзаро келишган ҳолда фарзандини 18 ёшга тўлгунига қадар бўлган давр учун ҳисобланган 111 миллион 880 минг сўм алимент пулларини олдиндан тўлиқ тўлади.

Шундан сўнг, ундирувчи К.М.нинг аризасига асосан мазкур ижро ҳужжати амалда тамомланди.