Марғилон шаҳрида Ички ишлар бошқармаси ходимига тан жароҳати етказган шахсга жиноят иши қўзғатилди. Бу ҳақда «Дарё»га вилоят ИИБ ахборот хизмати маълум қилди.
Қайд этилишича, 2022 йилнинг 4 август куни Марғилон шаҳар ИИБ профилактика инспектори М.Б. муқаддам товламачилик жиноятини содир этиб, ҳозирда озодликни чеклаш жазосини ўтаётган фуқаро Қ.Д.нинг хонадонига борган. Маҳкумнинг жазони ўташ талабларига риоя қилиш ҳолати ўрганилганда Қ.Д.нинг яшаш хонадонида йўқлиги аниқланган.
Шундан сўнг профилактика инспектори унга нисбатан тегишли ҳужжатларни расмийлаштираётган вақтда Қ.Д хонадонига етиб келган. Ички ишлар ходимининг қонуний фаолиятига фаол қаршилик кўрсатиб, бир неча бор огоҳлантирилишига қарамасдан, унга ташланиб, тан жароҳати етказган.
Мазкур ҳолат юзасидан Марғилон шаҳар прокуратураси томонидан Жиноят кодексининг 219-моддаси 1-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган. Тўпланган ҳужжатлар жиноят ишлари бўйича Марғилон шаҳар судига тақдим қилинган. Суднинг 2022 йил 29 сентябрдаги ҳукмига кўра, Қ.Д.га нисбатан 3 йил 1 ой муддатга озодликдан маҳрум қилиш жазоси тайинланган.
Изоҳ (0)