Япониядан Ўзбекистоннинг тарихий шаҳарларига авиарейслар йўлга қўйилиши режалаштирилмоқда, деб хабар беради Туризм ва маданий мерос вазирлиги матбуот хизмати.
Қайд этилишича, Ўзбекистон делегациясининг Японияга ташрифи доирасида бош вазир ўринбосари — туризм ва маданий мерос вазири Азиз Абдуҳакимов Аll Nippon Airlines авиакомпанияси вице-президенти Жуничиро Миягава билан музокара ўтказди.
Учрашувда Япониядан Ўзбекистоннинг тарихий шаҳарларига тўғридан-тўғри авиарейсларни йўлга қўйиш, республикага келувчи япониялик сайёҳлар оқимини ошириш ва туризм соҳасидаги лойиҳаларни амалга ошириш масалалари муҳокама этилди.
Жуничиро Миягава Ўзбекистон япониялик сайёҳлар учун жозибадор мамлакат эканини қайд этиб, Шавкат Мирзиёев бошчилигида олиб борилаётган ислоҳотлар сабаб япониялик туристларнинг Ўзбекистон тарихи ва маданий меросига бўлган қизиқиши тобора ортиб бораётганини таъкидлади.
2022 йилнинг августидан Uzbekistan Airways томонидан Тошкент—Токио—Тошкент халқаро йўналишидаги мунтазам рейслар тиклангани ҳамда фуқаролик авиаташувларни ривожлантиришда яқиндан ҳамкорлик йўлга қўйилганини инобатга олиб, АNА авиакомпаниясининг Япониядан Ўзбекистоннинг туристик шаҳарлари (Самарқанд, Бухоро, Урганч)га авиарейсларни йўлга қўйиш таклиф этилди.
Шунингдек, Аll Nippon Airlines компаниясининг Токио ва Осака шаҳарларидан Самарқанд шаҳрига чартер дастурларини амалга ошириш масаласини ишлаб чиқишга келишилди.
Изоҳ (0)