Фарғона вилоятида ўқувчилари фан олимпиадаларида юқори натижага эришган ҳамда самарали фаолият юритиб келаётган бир гуруҳ ўқитувчиларга вилоят ҳокимининг махсус устамаси берилади. Бу ҳақда ўқитувчи ва мураббийлар куни муносабати билан ўтказилган тантанали тадбирда маълум қилинди, деб хабар бермоқда «Дарё» мухбири Азизжон Эрматов.
2021 йил якунларига бағишлаб ўтказилган Халқ депутатлари вилоят Кенгаши сессиясида Хайрулло Бозоров томонидан энг яхши кўрсаткичларга эришган мактаб ўқитувчилари учун вилоят ҳокимининг махсус устамаси жорий этилиши маълум қилинганди.
Шундан сўнг вилоят халқ таълими бошқармаси томонидан ўқувчилари халқаро, республика ва вилоят фан олимпиадаларида юқори натижаларга эришган ҳамда самарали фаолият юритиб келаётган 122 нафар фан ўқитувчилари аниқланган.
Ўқитувчи ва мураббийлар куни арафасида ушбу фаол педагогларга ойлик иш ҳақининг 20 фоизидан 100 фоизигача миқдорда вилоят ҳокимининг устамаси тўлаб берилган.
Таъкидланишича, ҳар чорак якуни бўйича энг яхши кўрсаткичларга эришган 200 нафар ўқитувчига вилоят ҳокимининг махсус устамаси бериб борилади.
Изоҳ (0)