Таом тайёрлашда ёқимли ифорлар ошхонани тўлдирганда, саримсоқ ёки қовурилган пиёзнинг ҳидидан завқланиш мумкин. Аммо кўплаб уй бекалари овқат пиширгандан кейин қўлларидан келадиган пиёз, балиқ ёки саримсоқ ҳидини ёқтирмайди. «Новий очаг» нашри ушбу ёқимсиз ҳидни кетказишнинг 10 та усули билан бўлишди.
Лимон шарбати
Балиқли кечки овқат тайёр, аммо қўлдан балиқ ҳидини қандай кетказиш мумкин? Лимон кислотаси балиқ ҳидининг манбайи бўлган аминларни аммоний тузларига айлантиради ва улар рецепторларни ҳеч қандай тарзда безовта қилмайди. Балиқ ҳидидан халос бўлиш учун қўлларингизни лимон шарбати билан ювиш ёки бармоқлар ва кафтларни яримта лимон билан ишқалаш лозим.
Пўлат
Бу қўлдан ёқимсиз ҳидни кетказишнинг ғайриоддий, аммо жуда самарали усули. Агар пўлатдан ясалган идиш ёки това бўлса, қўлни унга ишқалаш ёки шунчаки бир нечта санчқилар билан қўл ювиш керак, шунда ёқимсиз ҳиддан халос бўлиш мумкин.
Қаҳва доналари
Бу пиёз ва саримсоқ ҳидини қўлдан кетказишнинг энг яхши усулларидан биридир. Бунинг учун бир нечта дон ёки майдаланган қаҳва ишқаланади, кейин қўл совунлаб ювилади. Агар қаҳва ҳиди ёқмаса, ушбу усул тавсия этилмайди.
Истеъмол содаси
Кундалик ҳаётда истеъмол содасидан фойдланишннг сон-саноқсиз усуллари мавжуд. Мана улардан яна бири. Ушбу восита қўлдан бензин ёки хлор ҳидни кетказиши мумкин. Бунинг учун кафтларга бир чой қошиқ сода солиниб, қўллар ишқаланади, кейин ювилади.
Тиш пастаси
Маълум бўлишича, пастадан балиқ, пиёз, саримсоқ ҳидларини кетказиш учун ҳам фойдаланиш мумкин. Дастлаб қўллар тиш пастаси билан ювилиб, кейин яхшилаб чайилади.
Совуқ сув
Юқоридаги усуллардан ҳеч бири маъқул келмаса, қўлдан ёқимсиз ҳидни қандай кетказиш мумкин? Бунинг учун қўллар шунчаки совуқ сув остига қўйилади. Шуни ёдда тутиш керакки, совуқ сув бензин ва хлор каби кимёвий моддаларнинг ҳидидан халос қилолмайди.
Петрушка
Петрушка ёрдамида нафақат оғиздан келаётган саримсоқ ёки пиёз ҳидини кетказиш мумкин. Балки у қўлдан келаётган ёқимсиз ҳидни ҳам бартараф этади. Петрушка барги қўллар орасида ишқаланади ва яхшилаб ювиб ташланади.
Туз
Қўлдаги пиёз, саримсоқ ёки ҳатто балиқнинг ёқимсиз ҳидини йирик туз билан яхшилаб ишқалаш ва кейин уларни бир неча марта сув остида ювиш орқали йўқ қилиш мумкин. Тери устида ҳеч қандай яра ва жароҳатлар бўлмаса, бу усулдан фойдаланиш мумкин.
Резина қўлқоплар
Албатта, қўлдаги ёқимсиз ҳиддан халос бўлишнинг энг ишончли йўли унинг терига сингиб кетишининг олдини олишдир. Бунинг учун шунчаки ошпазлик қўлқопларидан фойдаланиш мумкин.
Зайтун мойи
Пиёз ёки саримсоқни майдалашдан аввал қўлга зайтун ёки бошқа ўсимлик мойи суртиш тавсия этилади. Ёғ терида ҳимоя тўсиғини яратади ва уларнинг ҳидидан ҳимоя қилади. Фақат ёғдан кўп қуйиб юбормаслик лозим, акс ҳолда маҳсулотларни тўғраш қийинлашади.
Изоҳ (0)