«Эргаш Каримов билан муҳаббатга тўла ҳаёт кечирдик». Ўзбекистонда хизмат кўрсатган артист Роза Каримова билан суҳбат (видео)
«Дарё» мухбирлари 1 октябрь «Устоз ва мураббийлар куни» муносабати билан устоз санъаткор, 86 ёшни қаршилаётган Ўзбекистонда хизмат кўрсатган артист Роза Каримовани йўқлади. Бир вақтлар ўзбек санъатидаги энг бахтли жуфтлик саналган Роза Каримова марҳум турмуш ўртоғи, улар асос солган миниатюралар театри ва шахсий ҳаёти ҳақида сўзлаб берди.
— Эргаш Каримов билан аввалги театр ва рассомчилик институтида бирга ўқиганмиз. 2-3 йил бирга ўқиб, бир-биримизни яхши билгач оила қуришга қарор қилганмиз. Шукрки, ҳаётимиз меҳрга тўла ўтди. Шу боисдан халққа танилиб, омадимиз кулиб боқди.1965 йил Ўзбекистон телеведениесидаги «Ёшлар» студиясида миниатюралар театри очилди. Эргаш Каримов студиянинг бош муҳаррири Элбек ака билан дўстлашиб қолди. Улар бир-бири билан шунчалик яқин дўст бўлишдики, ҳатто уйдаги ишларни ҳам бир-бири билан маслаҳатлашиб қилишарди. Тез орада студияда янги қаламкашлар иш бошлади. Эргаш акам қизиқчиликка мойиллиги юқори бўлган ижодкорларни студияга ишга жалб қилди. Эргаш Раимов, Алп Жамол ва Фарҳод Мусажонов каби кўплаб қаламкашлар иш бошлашди.
Фото: Роза Каримова шахсий архивидан
Барча ижодкорлар йиғилиб, одамлар чалғитмаслиги учун хоналарининг эшикларини қулфлаб, сценарийларни ёзишарди. Телеминятуралар машҳур бўлиб кетганидан кейин вилоятлардан раис ва бригадирлар келиб Эргаш акани излашарди. У пайтда Ўзбекистон телевидениясида асистент бўлиб ишлардим. Шунда Убай Бурҳон ёнимга келиб: «Эргаш акани топиб келинг», дерди. Турмуш ўртоғим шахмат ва билярд ўйинларини яхши кўрарди. Ўйингоҳга келсам ютаётган бўлса, яхши кайфиятда кутиб оларди. Ютқазаётган бўлса «Нимага келдинг? Ўзи ишдан қочиб шу ерга келдим-ку», деб койиб берарди. «Пахтакор ютганда, ютқазганда» деган миниатюралар ҳам ўша жараёнда ёзилган.
Фото: Роза Каримова шахсий архивидан
У пайтда томошабинлар кинога эмас, миниатюрага ишқибоз бўлиб қолган эди. Ҳар икки-уч кунда телевиденияга қоп-қоп хатлар келарди. Хатлар орасида «Эргаш ака мен ичкиликни ташладим, сизга раҳмат» каби ижобий гапларни ўқиб, қувониб кетардик. Сценарий муаллифлари хатларни бирма-бир ўқиб, шунга қараб режалар қилишарди.
«Рашк сабаб театр ва дубляждан кетганман»
Фото: «Дарё»
— Институтни битиргач, ишга кириш учун ҳозирги Ўзбек Миллий академик драма театрига борганман. Улар синов асосида ишга олишларини айтишган. Ўша пайтда «Гамлет» песаси асосида спектакль саҳналаштирилганди. Балл саҳнасида бир йигитга қўлимни тутиб, саҳнанинг у четидан бу четига ўтишим керак эди. Уни актёр Обид Юнусов кўриб қолибди. Бу актёр Ҳасан Йўлдошев билан қадрдон дўст бўлган. Ҳасан ака эса турмуш ўртоғимнинг яқин инсони бўлган. Обид ака турмуш ўртоғимга қўнғироқ қилиб: «Эргаш қаерда юрибсан? Хотининг Ҳамза театрида юрибди-ку», деган. Ҳали ишга олинмаган бўлсам ҳам, Эргаш ака ишдан қайтиб тўполон қилганди. У пайтларда Ҳамза театрининг у қадар обрўси йўқмиди, аёлларни у ерда ишлашга юборишмасди. Эргаш ака жанжал қилганидан кейин театрга ишга кириш фикридан қайтиб, дубляжга боргандим. У ерда бир аёл билан танишдим ва иккита фильмнинг дубляжида иштирок этдим. Аксига олиб Обид Юнусов ҳам бу ерда лидер экан. Эргаш акага қўнғироқ қилиб айтгандан кейин уйда яна жанжал бўлди.
Фото: «Дарё»
Анча вақт ўтиб, турмуш ўртоғимнинг ҳовури босилганидан кейин «Нега бундай қилдингиз?, Қаерга ишга боришим керак?», деганимдан кейин «Дубльяжда Наби Раҳимов бор. У хушчақчақ инсон, кўҳликкина қизларни кўрса ёнига келиб гапга солади», деб дубляжга боришимни истамаганини изоҳлади. Шу орада телевиденияда иккита янги бўлим ташкил этилди. Устозим адабий бўлимга таклиф этди. Эргаш акага «Театр ва дубляжда эмас, телевиденияда сизнинг ёнингизда бўламан», деганимдан кейин ишлашга рухсат берди.
«Эргаш Розага кўп рол бераяпти дейишди»
Фото: «Дарё»
— Миниатюралар театрига театр актрисалари ҳам таклиф этиларди. Улар тайёргарлик жараёнларида иштирок этишарди-ю, баъзан спектакллари бўлиб қолгани учун съёмкага келишолмасди. Мана шу сабаб мени ҳам миниатюраларга жалб қилишди. Илк ролимни «Икки тийин» номли миниатюрада ижро этганман. Иштироким муҳаррирларга ҳам, томошабинларга ҳам маъқул келган. Аммо баъзи бир ғаламислар «Нега эр-хотин суратга тушиши керак? Эргаш Розага кўп рол бераяпти», деб гап-сўз қилган. Шу орада машҳур шоира Зулфияхоним ўзи ишлайдиган «Саодат» журналига таклиф этган. Эргаш ака ва мендан суҳбат олиб, биз ҳақимизда икки саҳифа мақола чоп этган. Ана шундай кейин ортиқча гап-сўзлар тинган.
— Эргаш ака билан бир ўғил ва бир қиз фарзандларни тарбияладик. Қизим шифокор, ўғлим архитектор бўлди. Дадаси фарзандларининг санъаткор бўлишини унчалик истамади. Чунки боланинг ўзида илоҳий хоҳиш бўлиши керак. Мажбурлик сабаб санъатни эгалласа, ижод қилолмайди. Дадаси раҳматли шифокорликка қизиқарди, Озода қизимиз институтга киришига у билан баробар тайёргарлик кўрган. Қаерга борса шифокорликка оид китобларни кўтариб келарди. Шукр, икки боламдан тўрт набиралик бўлдик. Шириндан шакар эвараларим ҳам бор, — дейди Ўзбекистонда хизмат кўрсатган артист Роза Каримова.
Изоҳ (0)