Тошкент вилояти Зангиота туманида фуқаро Malibu автомобилида пойтахтга 3 килограмм гашиш олиб ўтаётган вақтда тўхтатиб қолинди. Бу ҳақда вилоят ички ишлар бош бошқармаси ахборот хизмати хабар берди.
Қайд этилишича, Тошкент вилояти ИИББ ҳамда ДХХ Тошкент вилояти бошқармаси ҳамкорлигида Зангиота туманида тезкор тадбир ўтказилган.
Тезкор-қидирув тадбири натижасида 1991 йилда туғилган фуқаро А.Б. (Тошкент шаҳрида яшовчи) ўзига тегишли бўлган Malibu автомашинасида 2 килограмм 933 грамм гашиш гиёҳвандлик воситасини Термиздан Тошкент шаҳрига олиб келаётган вақтида ушланди.
Ҳолат юзасидан унга нисбатан Зангиота тумани ИИБ тергов бўлими томонидан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) 5-қисми билан жиноят иши қўзғатилган.
Изоҳ (0)