Тошкент вилоятида жорий йилнинг 8 ойи давомида автотранспорт воситаларининг 372 тасида ўрнатилган газ баллонлари носоз экани аниқланган. Бу ҳақда Тошкент вилояти ҳокимлиги ахборот хизмати хабар берди.
Хабарда айтилишича, автотранспорт эгалари талабга жавоб бермайдиган газ баллонларни рухсат олмай ўрнатиб олган.
«Шу туфайли ҳайдовчиларга нисбатан маъмурий баённома расмийлаштирилди. Автоуловлар вақтинчалик жарима майдонига қўйилди. Шунингдек, автоуловларни жарима майдонидан чиқариш вақтида ноқонуний газ баллонлар ечилди», – дейилади ахборотда.
Маълумот учун, Тошкент вилоятида жисмоний шахсларга тегишли жами автомобиллар сони 324 минг 154 тани ташкил этмоқда.
Эслатиб ўтамиз, август ойида Сирдарё вилоятининг Оқолтин туманида Isuzu автобуси газ баллони портлашидан 6 киши ҳалок бўлиб, 15 киши тан жароҳати олганди.
Аввалроқ Олий Мажлис Сенатининг ўттиз иккинчи ялпи мажлисида Қутбиддин Бурхонов белгиланган миқдордан кўп газ қуйган шохобча лицензиясини бекор қилиш бўйича таклиф киритган эди. ҳолат юзасидан Жиноят кодексининг 262-моддаси (транспортни таъмирлаш ёки уни фойдаланишга чиқариш қоидаларини бузиш) 3-қисми «а» банди билан жиноят иши қўзғатилган.
Изоҳ (0)