Ўзбекистон автомобиль бозоридаги ҳолат: пасайган божхона талаблари, ўсаётган «иномарка» савдоси, талабгир автомобиль русуми ва энг кўп машинага эга ҳудудлар рўйхати ҳақида
Ўзбекистон автомобиль бозоридаги фаолият баҳоланди. Савдоларнинг сезиларли ўсиши қайд этилди. Бу ҳақда «Дарё»га Review хабар берди.
Ҳозирги кунда автомобилларга бўлган талаб анча барқарор бўлиб, шу йилнинг январь ойида бошланган фаоллик ўсиш тенденциясини давом эттирмоқда.
Август ойида автомобиль сотиб олишга қизиқишнинг ортиши қайд этилди, бу валюта курсларининг ўзгариши ва истеъмолчиларнинг пул маблағларини инвестиция қилиш истаги ортиши билан боғлиқ.
Жорий йилнинг август ойида сотилган автотранспорт воситаларининг умумий сони 119,3 мингтани ташкил этди, бу июль ойига нисбатан 16 фоизга кўп.
Рўйхатга ва қайта рўйхатга олинган автомобиллар сони ўзгариши:
Йил бошидан буён мамлакатнинг барча ҳудудларида автомобиль савдоси сезиларли даражада ошди. Жумладан, энг юқори ўсиш суръатлари Наманган — 44 фоиз, Қашқадарё — 34 фоиз ва Жиззах вилоятларида — 23 фоиз қайд этилди.
2021 йил август ойига нисбатан автомобиль савдоси 2 баравар ошди (+61,9 минг).
Йил бошига келиб жисмоний шахсларга тегишли автомобилларнинг умумий сони 3,1 миллионни ташкил этди, бу ўтган йилга нисбатан 0,28 миллионга кўп.
Шундай қилиб, Ўзбекистоннинг ҳар мингта доимий аҳолисига ўртача 87 та автомобиль тўғри келади. Статистика маълумотларига кўра, мамлакатда ҳар 12 кишидан бири автомобилга эга.
Энг кўп автомобиллар Тошкент шаҳрида рўйхатга олинган — 525 028 та. Пойтахтдан кейин энг кўп рўйхатга олинган автомобиллар Самарқанд вилоятида — 392 475 та, Тошкент вилоятида — 324 154 та ва Фарғона вилоятида — 325 009 та.
Ҳудудлар бўйича жисмоний шахсларга тегишли энг кам рўйхатга олинган енгил автомобиллар Сирдарё — 68 278 та, Жиззах — 90 860 та ва Навоий вилоятларида — 97 439 та қайд этилди.
Иккиламчи автомобиль бозори
Август ойида иккиламчи бозорда 98 мингта автомобиль сотилган, бу ўтган ойга нисбатан 21 фоизга кўп. Шу билан бирга, иккиламчи автомобиль бозори йил давомида 2,2 баробар ўсди.
Бирламчи ва иккиламчи автомобиль бозори (2021-2022):
Маҳаллий автомобиллар савдоси
Август ойида маҳаллий ишлаб чиқарилган янги автомобилларнинг сотилиши 17 мингтани ташкил этди ва июль ойига нисбатан 7,5 фоизга камайди. Шу билан бирга, 2021 йил август ойига нисбатан савдо ҳажми 1,8 баравар ошди.
Хорижий автомобиллар савдоси
Чет элда ишлаб чиқарилган янги автотранспорт воситалари олди-сотди шартномалари сони 1,8 мингтани ташкил этиб, ушбу кўрсаткич ўтган ойга нисбатан 38 фоизга, ўтган йилнинг август ойига нисбатан эса 1,8 баробарга ошгани қайд этилди.
Маҳаллий ва чет элда ишлаб чиқарилган янги енгил автомобиллар савдоси улуши:
Хорижда ишлаб чиқарилган автомобиллар савдосининг бундай кескин ўсиши жорий йилнинг май ойидан бошлаб импорт қилинадиган автомобилларни олиб кириш учун божхона тўловларининг пасайиши билан изоҳланади, бу эса савдо ҳажмининг ўсишига таъсир кўрсатди.
Жорий йилнинг май—август ойларида хорижий автомобиллар савдоси ўтган йилнинг шу даврига нисбатан 1,6 баробарга ошган.
Ушбу даврда маҳаллий автомобиллар сотуви ҳам барқарор ўсишни кўрсатиб, 1,4 баробарга ошган.
Ўзбекистон автомобилларни сотишдан кўра сотиб олишда давом этмоқда
2022 йилнинг январь—август ойларида Ўзбекистон 511,6 миллион долларга тенг бўлган 20 765 та енгил автомобиль импорт қилган.
«Дарё» таҳлилига кўра, 8 ойдан буён автомобиллар импорти ўтган йилнинг шу даврига нисбатан 5 786 тага ошган.
Шу билан бирга, август ойида машина импорти ҳажми ўтган ойга нисбатан тушиб, 50,7 миллион долларга етган. Июлда Ўзбекистон 65 миллион долларлик автомобиль сотиб олган.
Таққослаш учун, январда автомобиллар импорти 65,7 млн, февралда 58,8 млн, мартда 64,8 млн, апрелда 91,1 млн, майда 40,1 ва июнда 75,4 млн долларни ташкил қилган.
Йил бошидан бери Ўзбекистон автомобиль экспорти ҳажми 187,2 млн долларни ташкил этди.
Шундай қилиб, 8 ой якуни бўйича автомобиль импорти экспортдан 216,5 миллион доллар — 2,4 мартага ошган.
Шу тариқа Ўзбекистон автомобилларни сотишдан кўра кўпроқ сотиб олишда давом этмоқда.
Ўзбекистонда қайси автомобиль энг кўп ишлаб чиқарилмоқда?
Ўзбекистонда 2022 йилнинг январь—август ойларида 187 610 та енгил автомобиль ишлаб чиқарилган.
«Дарё» ҳисоб-китобларига кўра, бу ўтган йилнинг шу даврида ишлаб чиқарилган автомобиллар сонига нисбатан 66 019 тага кўп.
Саккиз ой ичида энг кўп ишлаб чиқарилган автомобиль Cobalt бўлди — 60,6 мингта. Бу русумда ишлаб чиқарилаётган автомобиллар сони ўтган йилнинг мос даврига нисбатан 65,4 фоизга ўсган.
Августда Cobalt автомобилини ишлаб чиқариш ҳажмида ўсиш кузатилган — 7,7 мингта. Бироқ июль ойида атиги 3,5 мингта бундай автомобиль ишлаб чиқарилган. Июнь ойида бу кўрсаткич 10 мингдан ошиқ бўлган эди.
Январь—август ойларида енгил автомобиль ишлаб чиқариш бўйича Gentra (55,4 минг) иккинчи ўринни эгаллаган бўлса, Damas (46,6 минг) учинчи бўлди.
Бундан ташқари, йил бошидан бери 15 680 та Nexia-3 (ўтган йилга нисбатан 7,3 фоизга кўпайди), 8 657 та Spark (33,5 фоизга ошди), 12 168 та махсус енгил автомобиллар (37,4 фоизга ошди) ва 92 дона Tracker ишлаб чиқарилди.
