Бухорода пахта йиғим-теримида пахтанинг ноқонуний олди-сотдиси ҳамда яширин ёғ ишлаб чиқариш билан боғлиқ қонунбузарликлар аниқланди. Ҳолатни содир этган фуқароларнинг хатти-ҳаракати юзасидан терговга қадар текширув ишлари олиб борилмоқда. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Ғиждувон тумани Ички ишлар бўлими томонидан «Пахта-2022» йиғим терими мавсумида пахта хом ашёсини талон-тарож қилишнинг олдини олиш мақсадида тезкор тадбир ўтказилган.
Аниқланишича, туманнинг «Вазиршоҳ» ҳамда «Чағдари» маҳаллаларида яшовчи Ш.М., Р.С. ва Ш.Ж. исмли уч нафар фуқаро ISUZU русумли юк машинасида жами 6000 килограмм пахта хом ашёсини вилоятга олиб кетаётганлиги аниқланган.
Мазкур ҳолат юзасидан олиб борилган тезкор суриштирув ҳаракатлари давомида, ушбу шахслар пахта хом ашёсини Навоий вилояти Қизилтепа тумани «Ғойибон» маҳалласида яшовчи фуқаро Қ.Э.дан ҳар бир килограммини 9000 сўмдан сотиб олгани маълум бўлган.
«Пахта йиғим-терими мавсумида яна шундай қоидабузарликлар бири Қоракўл туманида содир этилди. Туманнинг ‘Тожикент’ маҳалласида яшовчи фуқаро Ж.Р. фермерга топширилиши керак бўлган пахтани ўз хонадонига олиб келган. Ички ишлар органлари ходимлари томонидан унинг яшаш манзили кўздан кечирилганда, молхонасида 230 килограмм пахта, 6 килограмм чигит ва пахтадан чигитни тозаловчи қўлбола дастгоҳ борлиги аниқланди. У ноқонуний равишда антисанитар аҳволда пахта ёғини ишлаб чиқаришга уринган», — деди Шуҳрат Жалолов.
Ҳар иккала ҳолат юзасидан суриштирув ҳамда терговга қадар текширув ҳаракатлари олиб борилмоқда.
Изоҳ (0)