Россия Украинада жанглар чоғида асирга олинган ўн нафар хориж фуқаросини Саудия Арабистони валиаҳд шаҳзодаси Муҳаммад ибн Салмон воситачилигида озод этди.
Саудия Арабистони Ташқи ишлар вазирлиги аниқлик киритишича, гап АҚШ, Буюк Британия, Швеция, Хорватия ва Марокаш фуқаролари ҳақида бормоқда. Улар ўтирган самолёт Саудия Арабистонига келиб қўнган. Буни Саудия давлат ахборот агентлиги эълон қилган видеода кўриш мумкин.
Улар орасида Украина томонида жанг қилиб, ДХРда асирликка тушган ва ўлим жазосига ҳукм қилинган Британия фуқаролари Шон Пиннер ва Эйден Аслин, шунингдек, Марокаш фуқароси Саадун Брагим ҳам бор. Улар баҳорда асирликка олинган, июлда эса суд уларни ёлланишда айблаб, ўлимга ҳукм қилганди.
Ал Арабия маълумотларига кўра, Саудия шаҳзодаси асирларни озод қилиш бўйича Москва ва Киев ўртасидаги музокараларда бевосита қатнашган.
Буюк Британия бош вазири Лиз Трасс беш нафар британиялик Россия томонидан озод этилганини тасдиқлади. У Саудия Арабистонига ва Украина президенти Владимир Зеленскийга ёрдам учун миннатдорлик билдирди.
Аввалроқ асирлар билан айирбошлашув доирасида Киев Москвага сиёсатчи Виктор Медведчукни ва 55 нафар россиялик ҳарбийларни топширганди.
Мавзуга доир:
- БМТ Киев ва Москвани «ҳаммасига ҳамма» форматида асирларни алмашишга чақирди
- Зеленский: «Мариуполда ҳарбий асирлар устидан суд ўтказилса, Украина Россия билан музокаралардан бош тортади»
- Россия ва Украина уруш бошидан буён ҳарбий асирлар ва ҳалок бўлган аскарлар жасадлари билан айирбошлаш бўйича 27 та операция ўтказган
- Блинкен Украина армияси сафида жанг қилган хорижликларнинг ДХРда ўлимга ҳукм қилинишини қоралади
Изоҳ (0)