Албатта, ҳар бир инсон ҳаётида ҳеч бўлмаса бир марта бўлса ҳам оёқ томирлари тортишишига дуч келади. Буни ҳеч нарса билан адаштириб бўлмайди. Томир тортишиши жуда оғриқли мушакларнинг қисқариши бўлиб, улар ўз-ўзидан пайдо бўлиши мумкин. Ушбу ҳолат инсонни безовта қилади, уйқуни бузади ва сувда эса ҳаёт учун хавф туғдиради. Нима учун оёқ томирлари тортишади? Ушбу ҳолатга қандай муносабатда бўлиш керак? Организмдаги қандай ўзгаришлар бу аломатлар ҳақида сигнал бериши мумкин? «Новий очаг» нашри қуйида ушбу саволларга жавоб берди.
Оёқ томирлари тортишишига нима сабаб бўлиши мумкин?
Ушбу масала гиподинамия ва жисмоний фаолият билан бошланади. Ҳайрон бўлишнинг кераги йўқ, лекин айнан қарама-қарши омиллар томир тортишишига олиб келиши мумкин. Инсон бир ҳолатда узоқ вақт турса, оёқ-қўллардаги қон айланиши бузилади. Бу мушакларнинг спазмларини келтириб чиқариши мумкин. Гиподинамия билан бир қаторда, томир тортишиши ҳам мушаклардаги ортиқча стрессдан келиб чиқади. Кўпинча улар спортчиларда учрайди. Чўзилиш, кичик жароҳатлар, мушакларнинг максимал даражада ишлаши — буларнинг барчаси спазмларни келтириб чиқаради.
Шунингдек, томир тортишишининг сабаби ноқулай пойабзал кийиш, сувсизланиш, калий, кальций ва магний етишмовчилиги, чарчоқ бўлиши мумкин. Стресс ёки неврологик касалликлар ҳам шулар жумласидан. Одатда тунги томир тортишишни қўзғатадиган нарса стрессдир. Кўпинча бу ҳомиладор аёлларни безовта қилади.
Қандай касалликларда томир тортишиши кузатилади?
Баъзи касалликларда томир тортишиши безовта қилиши мумкин. Қандли диабет, гипертония, буйрак ва қалқонсимон без муаммолари, юрак етишмовчилиги ёки анемияда ҳам кузатилади. Бироқ мушаклардаги спазмлар кўпинча варикоз томирлари каби маълум касалликларга ҳамроҳ бўлади. Оёқ томирларининг тез-тез тортишиши томирларда нотекис қон оқими туфайли тромбознинг ривожланишини кўрсатиши мумкин.
Оёқлар томири тортишишида биринчи ёрдам
Оёқ томирлари тортишишида биринчи ёрдам — аввало қўшимча стрессни бартараф этиш учун одамни қулай ҳолатда ётқизиш ёки жойлаштириш керак. Агар бармоқлар ёки болдир мушаклари сиқилган бўлса, икки қўл билан оёқ уларни маҳкам ушлаб, тортиш керак.
Агар томир тортишиши камдан кам кузатилса, бу ҳолатни ишқаш ва массаж қилиш орқали енгиллаштириш мумкин. Иссиқ душ, совуқ ёки иссиқ компресслар яхши ишлайди. Агар компресс қилиш ёки душ олишнинг иложи бўлмаса, шунчаки полда юриш тавсия этилади.
Томир тортишиши мунтазам безовта қилса
Юқорида айтиб ўтилганидек, доимий томир тортишишлар организмдаги қандайдир муаммо ҳақида сигнал беради. Бундай ҳолда терапевтга мурожаат қилиш керак. Шифокорга спазмларни аниқ нима қўзғатаётганини тушунтиришни унутманг: жисмоний фаолият, оёқларнинг ноқулай ҳолати, юриш ёки стресс. Бундан ташқари, бу қанчалик тез-тез содир бўлишига ҳам эътибор қаратиш лозим. Тадқиқот натижаларига кўра, шифокор ташхис қўяди ва даволанишни буюради.
Изоҳ (0)