Россияда сафарбарлик эълон қилинганидан кейин мамлакат фонд бозори қулади

Россия президенти Владимир Путин қисман сафарбарлик эълон қилганидан кейин Россия фонд бозори 10 фоизга қулади. Бу ҳақда Forbes хабар бермоқда. 

Москва фонд биржаси индекси 200 дан ортиқ пунктни йўқотди ёки 9,6 фоизга, RTС индекси 100 пунктни йўқотди ёки 11,8 фоизга тушиб кетди. Пасайиш етакчилари орасида Yandex, ПИК ва «Сургутнефтегаз» компаниялари акциялари бор.

Тошкент вақти билан 13:35 ҳолатига кўра, Москва биржаси индекси 2 161 пунктни ташкил этди, бу охирги савдо сессиясининг ёпилишидан 2,43 фоизга паст. RTС индекси 3,04 фоизга пасайиб, 1 119 пункт бўлиб турибди.

Россия валютаси рублнинг қиймати ҳам пасаймоқда. Айни пайтда рубль деярли 4 фоизга тушди. 

Рубльга нисбатан долларнинг қиймати июнь бошидан буён максимал даражага кўтарилди — 62,8 рубль. Шунга қарамай, таҳлилчилар яқин орада котировкалар тикланишини кутмоқда. 

Сафарбарлик тадбирлари 21 сентябрь куни бошланади. Путин ҳудудлар раҳбарларига «ҳарбий комиссарликлар иши учун зарур барча ёрдамни кўрсатишни» буюрди.

Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади.