Бугунги кунда республикадаги боғчалар сони 28 минг 12 тани ташкил этмоқда. Бу ҳақда Сенат кенгашининг навбатдаги мажлисида маълум қилинди, дея хабар бермоқда «Дарё» мухбири.
Йиғилишда Сенат раиси Танзила Норбоева республикада мактабгача таълим ташкилотлари сони йилдан йилга ортиб бораётганини айтди.
«2017 йилда республика бўйича жами 5 минг 211 та мактабгача таълим ташкилотига 708 минг 247 нафар бола (3-7 ёшдаги болаларнинг 27,7 фоизи) қамраб олинган бўлса, бугунги кунга келиб, 28 минг 12 та мактабгача таълим ташкилотига 1 миллион 957 минг 358 нафар бола (69,4 фоиз) қамраб олинган», — деди Сенат раиси.
Маълум қилинишича, 2022 йил 1 январь ҳолатига мамлакатда 6 минг 300 та давлат мактабгача таълим ташкилоти фаолият кўрсатиб, уларда 1 миллион 276 минг нафар бола қамраб олинган. Шундан 1 минг 185 та давлат боғчаларида овқатланиш аутсорсинг усулида ташкил этилган бўлса, 5 минг 145 таси ўз ошхонасига эга.
Аввалроқ Танзила Норбоева давлат боғчаларида овқатланишни ташкил этиш тизимидаги камчиликларни танқид қилганди.
Изоҳ (0)