Ўзбекистоннинг Венгриядаги элчиси (қароргоҳи Вена шаҳрида жойлашган) Абат Файзуллаев Будапешт шаҳрида «Медитоп» компаниясининг бошқарувчи директорлари Золтан Ач ва Давид Грешковиц билан музокаралар ўтказди, деб хабар бермоқда «Дунё» ахборот агентлиги.
Қайд этилишича, музокаралар давомида Венгрия компанияси билан Ўзбекистонда фармацевтика маҳсулотларини маҳаллийлаштириш лойиҳасини амалга ошириш масаласи муҳокама қилинган.
Золтан Ач мамлакатга сафарлари чоғида Ўзбекистон раҳбарияти томонидан иқтисодиётнинг барча жабҳаларида амалга оширилаётган ислоҳотлар ўзининг ижобий натижасини бераётгани ва Ўзбекистон минтақада изчил ривожланиб бораётганига шахсан гувоҳ бўлганини маълум қилган.
«Ўзбекистон ҳукуматининг хорижий инвесторларни қўллаб-қувватлаётгани, инвесторлар учун яратилган қулай инвестиция муҳити ва шароитлар, шунингдек, юқори билим ва кўникмага эга бўлган ёшлар ‘Медитоп’ компаниясини Ўзбекистон бозорига кириши учун туртки бўлди», — дейди у.
Компания бошқарувчи директори Давид Грешковис Ўзбекистонда амалга оширилиши кўзда тутилган инвестиция лойиҳасини, хусусан, рўйхатга олинган дори воситаларини маҳаллийлаштириш лойиҳаси бўйича ҳамкорлик қилишга тайёр эканини билдирган. Бу соҳада муайян тажрибага эга бўлган маҳаллий ҳамкор топиш юзасидан амалий кўмак сўраган.
Бундан ташқари, музокаралар давомида «Медитоп» компанияси билан ҳамкорликда фармацевтика йўналишида кадрлар тайёрлаш ва маҳаллий ишлаб чиқарувчи компаниялар ходимлари учун Венгрияда малака ошириш курсларини ташкил этиш бўйича дастлабки келишувларга эришилган.
Изоҳ (0)